Shillong, Naitung 27
Ka India ka la khur biang ïa ka takma ha ka Commonwealth Games lyngba ka nongrah nar ka Gyaneshwari Yadav ha kaba ka la khur ïa ka takma rupa ha ka final jong ka 53kg.
Kane ka long ka takma kaba saw na ka weightlifting ha ka Commonwealth Games kaba dangïaid mynta ha Glasgow. Kham hashwa, ka Mirabai Chanu ka la khur ïa ka takma ksiar ha ka 48kg, kumjuh ïa ki takma rupa la khur da u Rishikanta Singh (men’s 60kg) bad u Muthupandi Raja (men’s 65kg).
Kane ka jingïakop rah nar ka kynhun ïa ki ar tylli ki jingïalehkai kata ka snatch bad ka clean and jerk, ha kaba ki nongshim bynta ki lah ban pyrshang mar lai sien ha baroh ar ki jingïakop.
Ha ka clean and jerk, ka Gyaneshwari ka la lah ban rah 111kg. Hynrei ka Didih ka la lah ban rah 113kg na ka bynta ban bteng ïa ka jingkhur takma ksiar jong ka ha kane ka lympung.
Ka Gyaneshwari kaba 23 snem ka rta na Bhondiya kaba ha Chhattisgarh ka la lah ban rah 199kg (88kg snatch + 111kg clean and jerk), hynrei ka nongrah nar na Nigeria ka Onome Omolola Didih ka la lah ban rah 206kg (93kg + 113kg) na ka bynta ban bteng ïa ka jingkhur ïa ka takma ksiar ha kane ka lympung.
