Shillong, Lber 14
Ha ka lympung ïalehkai jong ka Shillong Cricket League Super Division 2024-25, ka Sporting CC ka lah ban pynliem noh da 4 wiket ïa ka Langsning CC ha ka jingïakhun ba la long ha madan Polo Shillong ha ka Sngi Thohdieng ba la pynlong da ka Shillong Cricket Association (SCA).
Haba phai sha ka jingïakhun, ka Langsning CC ka la jop kynting pisa ha kaba ka la kam trai ban tied nyngkong bad ïoh 144 run shuwa ban khyllem baroh 10 wiket na 40 over. U Bamanbha u la lah ban kamai 28 runs na 49 bol bad u Aaron Nongrum u la lah ban kamai 27 runs na 33 bol. Kine ki long nongtied kiba kongsan na ka bynta ka Langsning CC.
Katba na ka liang ki nongkawang bol jong ka Sporting CC, u Suraj Chettri u la lah ban shim 3 wiket, ai 24 ron na 9 over, u Rohit Yadav u la shim 3 wiket, ai 24 ron na 9 over.
Na ka liang ki rangïalehkai jong ka Langsning CC ki la lah ban ïalehkai bha ha kaba u Aaron Nongrum u la shim 2 wiket bad ai 24 ron na 9 over bad u Ibit Thabah u la lah ban shim 2 wiket bad ai 1 ron na ka 1 over. Wat la ka jinglah ban lehkai bha hynrei kim shym la lah satia ban khanglad ïa ka liang pyrshah ban poi sha ka thong, namar ka Sporting CC ka la lah ban kynjoh ïa ka 148 ron ba ka donkam bad khyllem 6 wiket na 36.4 over.
Ki rangïalehkai ka Sporting CC kiba kynthup ïa u Avinash bad Manish Sharma ki la lah ban lehkai bha na ka bynta ka kynhun. U Avinash uba la lam khmat ban tied nyngkong u la ïoh 65 ron na 109 bol, katba u Manish Sharma u la ïoh 38 ron na 45 bol kaba la ïarap ïa ka Sporting ban jop ïa ka jingïalehkai da 4 wiket.
Ha kane ka jingïalehkai u Manish Sharma na ka Sporting CC uba la ïoh 38 ron bad shim 2 wiket u la ïohpdiang ïa ka nam Player of the Match.
