Nongstoiñ, Lber 16
Ka kynhun ïalehkai jong ka Pyndengrei SCSC bad ka Sawlad SC ki la ïasam mar shi point ha ka lympung ïalehkai Super Division jong ka NDSA Premier League Football Tournament 2024-25 ba la pynlong da ka Nongstoiñ District Sports Association hadien ba ki la ïakhaid mar 3-3 kol ha ka sngi Saitjaiñ.
Haba phai sha ka jingïakhun hapdeng kine ar tylli ki kynhun kaba la long ha madan New Nongstoiñ, ka Sawlad SC ka la ïoh ban pynkhih jar nyngkong eh ha ka minit kaba 20 lyngba u Kyrshan Tariang, hynrei ha ka minit kaba 51 ka Pyndengrei ka la lah ban pynphai kylla lyngba u Alandonal Sohlangpiaw.
Hapdeng kane ka jingïalehkai kaba itynnad bad ïakhaid bha ha ka minit 71 u Wilson Iawren jong ka Sawlad SC u la ïoh ban pyntam biang da shi kol ïa ka Pyndengrei SCSC, kumjuh ha ka minit kaba 73 ka Sawlad SC ka la ïoh biang ban thep ïa ka kol kaba lai lyngba u Banshembha Iawren.
Wat la ka Pyndengrei ka la shah tam da ar kol ha kane ka jingïakhun hynrei lyngba ka jingïalehkai bha bad ka jingtrei shitom jong ki rangïalehkai ha ka minit kaba 82 u Silvestar Thongni rangïalehkai shakhmat ka Pyndengrei u la ïoh ban thep ïa ka kol ba ar. Une u juh rangïalehkai ha ka minit kaba 90 u la ïoh ban thep sa ïa ka kol ba lai kaba long ruh ka kol kaba ïada ïa ka kynhun na ka jingshah rem bad ruh kaba la pynlong ïa ka Pyndengrei ba kan poi sha ka jingïakhaid mar 3 kol.
