Tigard, Ore:
Katkum ki khubor, la iathuh ba ha ka Sngi Palei, la iohsngew ia ka jingsawa ki tyndong suloi na katei ka jaka die kali Tesla ha Oregon ha ka sien kaba ar tang hapoh jong ka shi taiew ha ka jingpynjot bad jingïakhih kaba dang ïaid shakhmat ha kylleng ka ri naduh ba u CEO katei ka kompeni- u Elon Musk u la long u briew ba kongsan ha ka sorkar jong u Trump.
La iathuh ba ha ka por kumba 4:15 baje mynstep, ki la don palat shispah tylli ki kuli kiba la siat ha kylleng katei ka jaka die kali ilektrik marjan bad ka Portland ha Tigard. Kane ka jingshah siat ka la pynjulor jur ia ki kali bad ki jingkhang jong kitei ki dukan ‘showroom’ ha katei ka jingjia.
Ha kawei pat ka jingjia, la ong ba ha ka 6 tarik u Lber, ka US ka la mad ia kum katei hi kajuh ka jingjia ha katei hi kajuh ka jaka. Ki pulit ki la ong ba ki dang ïai bteng ban ïatreilang bad ka sorkar pdeng ha ka FBI bad ka Bureau kiba dei khmih ia ki laiñ jong ka kyiad, duma bad ki tiar siat bad ki tiar pynbthei ban tohkit bniah bad ban bud-dien ia kine ki jingjia thombor kiba ka US ka sakhi ha kine ki sngi.
Ka Tesla ka la long ka thong jong ki jing-iakhih bad ki jingpynjot ha US bad sha kiwei ki jaka mynta u snem. Ki briew ki la pyrshah ia ka tnat treikam jong ka sorkar jong u Musk, lane ka DOGE namar ki kyndon kiba ka la wanrah bad ki rukom treikam jong ka.
Ki pulit ki la ïathuh ha ka taiew ba kut ba ki hynriew tylli ki kali Tesla Cybertruck ha kawei ka jaka die kali ha ka thaiñ Seattle ha Lynnwood, ki la shah synreit da ki dak swastika bad ki kyntien kren beiñ kiba la la thoh bad kren pyrshah ïa u Elon Musk.
Kumjuh u President ka US Donald Trump, ha ka Sngi Thohdieng u la ong ba u la thied kyrpang khnang ia ka kali Tesla kaba thymmai ban pyni ia ka jingai jingkyrshan jong u ia u Elon Musk, katba ka kompeni jong utei u heh spah ka ialeh pyrshah ia ka jinghiar ka jingdie bad ka jinghiar dor jong ki mar jongka ha kine ki sngi.
