Paris, Lber:
U President ka France, u Emmanuel Macron, ha ka Sngi Saitjaiñ u la ong ba ka Europe bad ka America ki la hap ban buh da ki kyndon kiba eh ia ka Russia ba kan pdiang ia ka jingthmu ban sangeh noh ia ka thma hapoh Ukraine.
Namar u Macron u la ong ba ka Russia kam shym la i-kwah shisha ia ka jingsuk, ia kane u Macron u la kren ha ka jingialang bad ki nongthoh khubor hadien ka ‘Video Conference’ jong ki ri kiba kyrshan ia ka Ukraine ha ka Sngi Saitjaiñ ba la pynlong da u Myntri Rangbahduh jong ka UK, u Keir Starmer.
Hynrei u la ong ba u President ka Russia, u Vladimir Putin pat u la ialeh ban pyni bor bad pynjur pynban ïa ka jingïaleh bad u kwah ban ïoh lut ia ki bynta jong ka Ukraine kat kiba ka Russia ka lah ban kurup ha ka por kaba kloi.
Namarkata ruh u Macron u la ong ba Ka Russia ka dei ban ai ka jubab kaba shai bad ka jingpynbor ka dei ban long kaba shai, ha ka jingiatreilang bad ka America, ban ioh ia kane ka jingsangeh thma.
Ha ka jingpynbna ba la pyllait hadien ka Sngi Saitjaiñ, ka ophis jong u ka la ong ba u Macron un ïakynduh ïa u Myntri Rangbahduh bathymmai jong ka Canada u Mark Carney ha ka Sngi Nyngkong ban ïakren halor ka thma ha Ukraine bad kiwei pat ki jingeh ha ka pyrthei.
Naduh ba u la wanphai biang sha White House ha u Kyllalyngkot jong une u snem 2025, U President jong ka America, U Donald Trump, u la ban jur ia ka jingkwah jong u, ban pynkut noh ia katei ka jingiakynad, kaba la neh la san snem kynthih bad u la wanrah ruh ia ka jing-iajan kaba phylla bad u President ka Russia- u Vladimir Putin.
Hynrei, hadien ka jingïakynad kaba la jur bha hapdeng jong u Trump bad u President ka Ukraine- u Volodymyr Zelensky hapoh ka ïing White House ha u bnai ba la dep, ka Ukraine ka la ialeh shitom ban wanrah biang ïa ka jingïadei bad ka US naka bynta ki jingiakren iasuk bad ka Russia bad ban pynioh biang ia ka jingkyrshan na ka US kumba ka ju leh baroh shi katta ha ki por jong u Joe Biden.
Haba iadei bad kane, ka Ukraine ka la ai jingkyrshan ïa ka jingtyrwa jong ka United States ban sangeh iasiat kumba 30 sngi, ha kaba ka Russia kam shym pat la pdiang satia haduh mynta.
