Taipei, Lber:
Ka tnat ïada jong ka Taiwan ha ka Sngi Ba-ar ka la pyntip ba ka la iohi ia 59 tylli ki liengsuiñ thma jong ka China ha kylleng sawdong jong katei ka ri dew-lynnong. La ong ba kane ka jing-leit syntiat jong ka China ha kane ka sien, ka kham palat shah ban ia baroh ki jingleit syntiat jong ka baroh shi katta.
Kane ka jingleh jong ka China ka long ruh hadien ba u President ka Taiwan- u Lai Ching-te, u la kynnoh ia ka China kum ka nongleh donbor ba nabar.
Nalor jong kitei 59 tylli ki liengsuiñ thma, ka China ka la phah syntiat ruh ia 9 tylli ki jhaj thma bad 2 tylli ki kynja ‘Balloon’ ban leit syntiat kylleng sawdong jong katei ka dew lynnong.
Kumjuh, na ka liang ka tnat ïada jong ka China, ka la pynbna ba kane ka long ka jingmaham kaba jur na ka bynta ka Taiwan ba ka dei ban pyndem bad mynjur ia ki rai bad jingtyrwa jong ka China.
Namar ka China naduh ki por barim ruh, ka ju kam trai ba ka Taiwan ka dei hi ka bynta jong ka China bad kaba shu paid la ka jong hynrei ka don hi, ha syndah jong ka China namar ka dei ka bynta jongka.
Namarkata, la ong ba ka China ka la nang phah ia ki liengsuiñ thma jong ka na ka por sha ka por ban leit syntiat bad ban maham ia ka Taiwan ba ka China ka lah ban pyniasoh noh ia katei ka ri dew-lynnong ha kano- kano ruh ka por ba ka sngewbit bad sngewdei.
Ha ka Sngi Palei mynshem taïew, u Lai u la ong ba ka China ka dei ka ri nongwei kaba leh don bor bad kaba kwah ban shu knieh jubor ia ka bor synshar na katei ka dew lynnong.
Hynrei u la ong ba ka Taiwan ruh kan ïakhun naka bynta ka hok jongka bad kan nym ailad ia ki bor ba nabar ba kin wan pyni bor ne synshar donbor halor u paidbah nongshong shnong jongka.
