Islamabad, Lber:
Lai tylli ki skulbah ha ka province Balochistan jong ka Pakistan, ki la pynsangeh khlem pud ïa ki jinghikai ban wan sha ki skulbah bad ki la kyrpad ïa ki samla pule ban leit sha ki jinghikai virtual klas kumba ka paw na ka daw ban wanrah ïa ka jingshngaiñ hapdeng ka jingkiew jong ki kam thombor ha katei ka thaiñ, ong ki lad pathai khubor.
Ka Skulbah Balochistan, kumjuh ka Skulbah Sardar Bahadur Khan Women’s bad ka Skulbah Turbat ki la rai ïa kane hadien ba la ïasyllok bad ki dean bad ki heh jong ki tnad pule puthi, ong ka khubor The Express Tribune newspaper.
Kane ka jingjia ka wan hadien ka jingshah thombor kaba la pynïap briew ha katei ka province. Ki lehnoh ha ka taïew ba la dep ki la knieh ïa ka rel Jaffar Express kaba don hajan ka Sibi. Ha katei ka jingshah thombor, ki don 26 ngut ki nongshah rahbor, kynthup ïa 18 ngut ki nong pahara, kiba la duh ei ïa la ka jingim. Naduh katei ka por, ki jingshah thombor bunsien ki la jia ha kylleng ka Balochistan.
Ki tyllong khubor ki la ïathuh ba ki lai tylli ki ‘varsity’ ki jaka pule skulbah ki la pynkynriah noh sha ki klas online hadien ki jingshah thombor bad ki jingbyrngem ha ka liang ka jingïada dang shen. Hynrei watla katta don ruh lai tylli ki skulbah ki la ai ki daw bapher-bapher ban pynsangeh noh ïa ki kam pule hapoh ki skulbah. Ka jingpynbna ba la pynmih da ka Skulbah Balochistan, ka ïathuh ba la khot ïa ka jingïalang bad ki dean bad ki sectional head, ha kaba la rai ba baroh ki campus, kin kylla noh sha ka jingpule lyngba ka virtual learning, tad haduh ban da mih ki hukum kiba kham bniah.
U Vice Chancellor jong ka Skulbah Balochistan, u Zahoor Ahmad Bazai, u ïathuh ha ka kot khubor online ka Dawn.com ba la pynkynriah noh sha ki klas online namar ba ki samla pule na ki jaka ba jngai kim lah ban poi sha ki jaka pule namar ka jingïakhih ha ki surok bah jong ka ri. “Tang shu lah ban pynbeit ïa ka jingeh bad ka jingkhang ïa ki surok bah jong ka ri, ka Skulbah Balochistan kan sdang biang ïa ki kam jong ka ha ki jinglong ba man ka sngi”, la ong u Bazai ha ka kotkhubor Dawn.
Ka Skulbah Sardar Bahadur Khan Women’s ruh ka la pynmih ïa ka jingpynbna kaba pynbna ïa kane ka rai kaba kumjuh. Ka la ong ba ki samla pule kin leit sha ki jinghikai online ha ka por Ramzan.
Ka kyrwoh ba la pynmih da ka Skulbah Trubat hadien ka jingïalang ba la pynïaid da u Vice Chancellor Prof Dr Gul Hasan ka la ong ba ha ka jingshai jong ka “jinglong jingman kaba don mynta”, ka jingïalang ka la rai ban pynsangeh noh ïa ki kam pule hapoh ka campus bad ki jinghikai naduh ka sngi Ba-ar.
