Shillong, Lber 20
Ka Rajasthan Royals (RR) ha ka Sngi Palei ka la jied ïa u Riyan Parag kum kapten ba shipor na ka bynta lai tylli ki jingïalehkai jong ka aïom ïalehkai Indian Premier League (IPL), na ka daw ba u kapten ba pura u Sanju Samson u dang shah sumar na ka jingmynsaw ka shynriah kti.
Katkum ki khubor, la ong ba ka rai ban thung ïa u Parag kum kapten ka dei hadien ba ka kynhun doktor jong ka BCCI ka la ai jingmut ïa u Samson ba un sangeh shwa na kaba ap wiket khnang ban ai por biang ïa ka kti jong u ban koit pura. U long, kumta, uba lah ban ïalehkai tang kum nongtied ha kaba sdang jong ka jingïalehkai, kaba khanglad ïa ka bynta jong u ban long tang kum u rangïalehkai ba kynsai.
U Samson u la ngat ïa katei ka jingmynsaw ha ka jingïalehkai Mumbai T20I pyrshah ïa ka England, ha kaba ka bol kaba u la tied ka la dei na ka kti jong u ha ka por ba kawang bol da u Jofra Archer. Te kumta u la shah sumar ha u bnai ba la lah.
“Ka Rajasthan Royals ka la pynbna ba u Riyan Parag un mihkhmat ïa ka kynhun na ka bynta ki lai tylli ki jingïalehkai ba nyngkong jong ka IPL 2025,” la ong ka kyrwoh na ka RR. “Une u rangïalehkai (all-rounder) un shimti ïa ka jingkitkhlieh ha ka jingïalehkai ba sdang pyrshah ïa ka Sunrisers Hyderabad ka ban long ha ka 23 tarik mynta u bnai, bud sa ka jingïakhun ha la ïing pyrshah ïa ka Kolkata Knight Riders ha ka 26 tarik bad ïa ka Chennai Super ha ka 30 tarik mynta u bnai.”
Ha ka rta kaba 23 snem, u Parag un shimti ïa katei ka kynhun kum u kapten ba dangkhynnah tam ha ka IPL. Ka rekod ban long u kapten ba khynnah tam ka dei ïa u Virat Kohli, uba la ïalam ïa ka Royal Challengers Bengaluru ha ka rta kaba 22 snem.
Ki nongïalam jong ka Royals ki la pynshai ïa ka rai jong ki ban jied ïa u rangïalehkai ka Assam ban ïa u Yashasvi Jaiswal uba la kham tbit bad kham shlur ha ka pyrthei.
“Ka rai jong ka Rajasthan Royals ban aiti ïa u Riyan ïa ka kam kapten ka pynpaw ïa ka jingshaniah jong ka kynhun ha ka jinglong nongïalam jong u, ka jingtbit kaba u la pyni lyngba ka jinglong kapten jong u ha Assam.”
“Namar ba u la long u dkhot ba kongsan jong ka Royals ha kine ki snem, ka jingsngewthuh jong u ïa ka jinglong ba thymmai jong ka kynhun ka pynlong ïa u ban long uba la pynkhreh bha ban rung sha kane ka bynta jong kane ka lympung,” la pynpaw ka RR.
