Gaza Strip, Lber:
U Myntri Rangbahduh jong ka Israel, Benjamin Netanyahu, u la ong ba ka jingsdang biang ïa ka jingpynïap pathar da ka jinghiar thma ha Gaza Strip, ka dei “tang ka jing-sdang,” da kaba maham ba ki jingïakren ïasuk hadien habud kan lah ban long dier por.
Ki shipai Israel ki la ther kynsan ïa ka Gaza ha ka Sngi Ba-ar ha kaba palat 420 ngut ki la ïap bad palat 560 ngut ki la mynsaw, bad ka la pynkheiñ ruh ïa ka jingïateh soskular ban sangeh thma kaba la sdang treikam naduh ka 19 tarik u Kyllalyngkot.
Ha ki dur la pyni ba bun na kiba la shah pynïap ki dei ki ‘riew paidbah kynthup ïa ki kynthei bad ki khynnah kiba la shah ther bom ïa ki ïing sah jong ki ha ka por miet.
Ha ka jingkren ha ka telebishon ba la pynmih da ka tnad pynbna paidbah jong ka Israel, u Netanyahu u la kam, “Ngi la pynjlan ïa ka jingsangeh thma da ki taiew wat la katta ngim shym la ïoh ïa ki nongshah rahbor kum ka jingsiew kylliang.”
“Ngi la phah ïa ki kynhun sha Doha bad ngi la pdiang ïa ka jingtyrwa jong u nongmihkhmat jong ka U.S. u Steve Witkoff, hynrei ka Hamas ka la kyntait ïa baroh ki jingtyrwa,” u la bynrap.
Ki lad pathai khubor jong ka Israel, ki la ïathuh ha ka sngi Palei ba la dep, ba u Witkoff, u la wanrah ïa ka jingtyrwa ba la pynthymmai sha baroh arliang, ha kaba u la tyrwa ban pyllait noh ïa san ngut ki nongshah rahbor ka Israel, na ka bynta ka jingïasuk kaba 50 sngi, ka jingpyllait ïa ki koidi Palestine, ka jingioh ïa ki jingïarap ïa ki paidbah bad ka jingïakren halor ka bynta kaba ar jong ka jingsangeh thma kaba lai bynta.
Ka Hamas ka la pynbna ha ka sngi Thohdieng ba ka la pdiang ïa ka jingtyrwa jong ki nongpynïasuk, da kaba mynjur ban pyllait ïa uwei u shipai Israel-America bad saw tylli ki metïap jong ki arngut ki nongshong shnong kum shi bynta ban sdang biang ïa ka bynta ba ar jong ka jingïakren na ka bynta ka jingsangeh thma ha Gaza bad ka jingpyllait mar kylliang ïa ki koidi.
U Netanyahu u la jubab, “Nga la maham ïa ka Hamas ba lada kam pyllait ïa ki nongshah kem jong ngi, ngin sdang biang ïa ka jingïaleh, bad mynta ngi la leh ia kata.”
Ka Israel, ka kheiñ ba ki don 59 ngut ki nong Israel, kiba shah set rahbor ha Gaza, ha kaba 24 ngut, ki dang im. Ha ka jingïapher, palat 9,500 ngut ki nong Palestine ki dang sah ha ki phatok jong ka Israel, ki shah ïa ka pynshitom beiñ, ka jingpynduh ïa ki lad jingdonkam bad jingïarap, bad ha baroh ha ka liang ka koit ka khiah, kaba la shim ïa kiba bun ki jingim briew, ong ka khubor jong ka hok longbriew manbriew jong ka Palestine bad Israel.
“Kane ka dei tang ka jingsdang nangne shakhmat, ngin sa leh pyrshah ïa ka Hamas da ka jingbitar kaba nang jur, bad ngin ïai bteng ban ïakhun ban pynurlong ïa baroh ki thong lyngba ka thma,” ong u Netanyahu.
