Shillong, Lber 23
U Managing Director (MD) ka Shillong Lajong Football Club (SLFC), Bah Larsing M Sawyan u la pynpaw ka jingsngew bynñiaw bym shym la don wat tang uwei ruh u rangïalehkai ka Jylla ban ïoh ka lad ban mihkhmat ïa ka ri India ha ka AFC Cup 2027 qualifier pyrshah ïa ka Bangladesh ha ka Sngi Ba-ar (25 tarik) ha JN Stadium, Polo.
“Kane ka kynhun ïalehkai ka ri India ka don ym duna ïa 7-8 ngut ki rangïalehkai na Manipur bad katto-katne ngut na Mizoram, hynrei kaba sngewsih pat ka long ba ki rangïalehkai ka jylla Meghalaya kim shym la ïoh jaka lem ban don lang bad kane ka kynhun,” la pynpaw u Bah Larsing haba ai jingkren ha ka jingïalang kitbok-kitrwiang ïa ka kynhun ïaleh -kai jong ka Myngken Christian ha ka sngi Saitjaiñ ha Hotel Centre Point.
Haba shem bad ïohi ïa kum kane ka jingjia, na ka liang u Bah Larsing u la ban jur ba ka por ka la dei ban ïashim lem ïa ka jingkut jingmut ba donkam ban ïa phai khmat bad ruh ban trei shit rhem ban pynkhlaiñ ïa ka jingïalehkai phutbol naduh ki kyrdan ïalehkai dang khynnah (grassroot), kaba hangne naduh ka Sorkar, ka MFA, ka SSA, ki synjuk ïalehkai phutbol na baroh ki district bad ki kynhun ïalehkai kiba don hangne hapoh ka Jylla ba ka por ka la dei ban ïatrei lang kawei khnang ban lah kynjoh sha ka thong bad ban saiñ dur ïa ki khynnah ïalehkai ki ban ïoh ban phong ïa ka jersey rong jngum jong ka ri India, ha kaba katno tam lei-lei ban ïohi ba ki samla lajong ba kin ïoh ban mih madan lem bad ka kynhun ïalehkai ka ri lada jia ba ïakhun ha la ïing lajong, kan dei shisha katta ka sngi jong ka jingkmen bad sngew sarong ïa ka jylla hi baroh kawei.
Kum u trai jong ka SLFC, u Bah Larsing u dap da ka jingkmen bad sngew sarong ba man la uwei pa uwei u rangïalehkai Khasi ba la dep ban mihkhmat ïa ka ri, ki dei kiba ka jingim ïalehkai jong ki ka la sdang na ka Shillong Lajong. “Ha kine 20 snem ba la dep, kum ka klob ka sngew sarong na ka shlem jong ka la lah ban sei ïa ki rangkynsai ba nylla kum u Rokus Lamare, Aiborlang Khongjee bad u Eugeneson Lyngdoh.”
Ha kajuh ka por u Bah Larsing u la pynkynmaw ba ha ka jingïalehkai ba la dep pyrshah ïa ka Maldives, u sngew sarong ba ha kane ka kynhun ka ri India ki la don lai ngut ki rangïalehkai kiba la san na ka Shillong Lajong. Kine ki long u Sana Khongsam, Mahesh Singh bad u Vishal Kaith. “Kine lai ngut rangïalehkai ki dei kiba la don bynta ha ka thup Goal 18 Programme jong ka klob,” la bynrap biang u Bah Ming.
