Shillong, Lber 23
Ka Nongmadan FC na Pynursla ka la lah ban pynthikna ban jam sha ka final ha ka 24th Kiang Ryngksai Football Tournament ba la pynïaid da ka Dawki Amateur Club.
Kane ka la wan hadien ba ka la lah ban pynliem noh ïa ka Backstreet J XI (Wahkdait) lyngba ka tie-breaker da 3-1 kol ha ka jingïakhun semi final kaba la long ha ka sngi Saitjaiñ ha madan phutbol jong ka Shing Lamin kaba ha Dawki.
Ha katei ka jingïakhun semi final kaba nyngkong kitei ki kynhun ki la ïathep mar 3-3 kol. Ïa ka kol kaba nyngkong la thep da Benny Khriam ha ka minit kaba 11 bad la pynbud da u Ribor Dkhar (64) ïa ka Nongmadan. Ka Backstreet J ka la pynphai kylla lyngba u Baby Malngar (45) bad u Robert Khongjoh (78).
Lyngba kane ka jingïakhaid ka la pynlong ïa ki bor pynïaid ban pynïakhun biang ïa ka extra time ha kaba ka Backstreet J ka la thep biang lyngba u Ïohbor Nonglyer (90+1), hynrei u Benny Khriam (90+20) u la pynphai kylla ïa ka Nongmadan. Hynrei dei ha ka jingïashut tie-breaker ba ka Nongmadan ka la lah ban kynjoh sha ka thong hadien ba la thep da 3-1 kol ïa ka liang pyrshah.
Kawei pat ka jingïakhun semi final kaba ar kan long hapdeng ka Sohkha Shnong Everlasting SC pyrshah ïa ka AMJ The Boys (Amjalong) mynta ka Lah Sngi U Blei ha ka por 2 baje nohphai sngi.
