Agartala, Lber:
Ka Twipra Students Federation, ka seng jong ki samla pule laitluid jong ka Tripura kaba ïasoh bad ka NESO, ha ka Sngi U Blei ka la weng noh ïa ka jingïaid paidbah kaba thmu ban pynlong ha Agartala ha ka 24 tarik u Lber.
Kane ka la jia tang hadien ka jingïakynduh bad u Myntri Rangbah ka Tripura u Manik Saha ha ka ïingsah jong u.
Haba kren kyrpang bad ka North East Now hadien ka jingïalang, u Vice President TSF John Debbarma u la pynskhem ba u Myntri Rangbah ka Jylla u Manik Saha u la pan por katto katne na ngi.
“U Myntri Rangbah ka jylla u la ong ba um pyrshah ïa ka jingthoh Roman. U la kyrpad ïa ngi ban ïaishah katto katne bad kumta ngi la rai ba ka jingïakhih jong ka Lah Sngi U Blei ka la sahkut noh”, la bynrap biang u Debbarma.
U Debbarma u la kheiñ kor ïa ka jinglong babha jong u Myntri Rangbah ka jylla halor katei ka mat.
U Myntri Rangbah ka jylla ha ka Social Media u la khot ïa kane ka jingïalang kaba seisoh.
“Ka jingïalang kaba seisoh bad ka kynhun jong ka Twipra Students Federation (TSF) ka la long ha ka janmiet jong ka Sngi U Blei.
Ki la ïasam ïa ki jingeh jong ki bad nga la pynthikna ïa ki ba ngin ïatreilang ban wad ïa ki lad ki lynti. Nga sngew-nguh ïa ka jingïeid jong ki ïa ka ‘Ek Tripura, Viksit Tripura’ bad ka jingaiti ïa ka jylla jong ngi sha ka roi ka par ha ki sngi ban sa wan na ka bynta ka Tripura,” ong u Myntri Rangbah ka jylla.
