Moscow, Lber:
Ka jingleit thombor jong ka Ukraine ha ka Sngi Nyngkong, ka la wanrah ia ka jingiap jong hynriew ngut ki briew ha ka thaiñ Luhansk, kaba don sha ka phang Shatei Lam Mihngi jong ka Ukraine, ba kynthup ia lai ngut ki nongthoh khubor, ong u Lat jong katei ka thain, uba la thung da ka Russia.
U Leonid Pasechnik, haba pynmih ia kane ka jingpynbna ha ka Telegram, u iathuh ba katei ka jingshah thombor, ka la shim ia ka jingim jong uwei u nongthoh khubor na ka tnat pathai khubor ‘Izvestia’ jong ka Russia, U Alexander Fedorchak. Kiwei pat kiba la khlad lang ha katei ka jingjia, ki kynthup ia u Andrei Panov bad u Alexander Sirkeli, uba dei u nongring dur ‘camera’ bad u ba dei ruh u nongñiah kali jong ka Zvezda, kaba dei ka channel TV kaba la pyniaid da ka tnat iada ri jong ka Russia.
Haba iadei bad kane, la ong ba uwei pat u nongthoh khubor uba trei ha ka Izvestia u la shah pyniap ha Ukraine ha u bnai Kyllalyngkot.
U Pasechnik, u iathuh ba uwei u khynnah, uba dang 14 snem ka rta, u la ngat lang bad khlad noh ha katei ka jingjia ha ka Sngi Nyngkong.
La jan baroh ki thaiñ Luhansk ki la shah knieh ha ki shipai Russia ha ka thma kaba la neh palat lai snem kaba la leit hiar thma da ka Russia pyrshah ïa ka Ukraine. Kumta, ka Luhansk ka la shah pynïasoh noh bad ka Russia, ryngkat bad lai tylli kiwei pat ki thaiñ kiba la bat shi bynta da ka Russia kiba kynthup ia ka nongbah Donetsk, Zaporizhzhia bad Kherson kiba long ki jong ka Ukraine hynrei kiba la shah kurup noh ha ka Russia hapdeng ka jingiakhun thma jong kitei ki arliang ri ha kine ki 3 snem ba la lep.
