Shillong, Lber 25
Ka jingangnud ka India ban ïoh ïa ki lai point ha ka jingïakhun kaba nyngkong jong ka AFC Asian Cup 2027 qualifier kam shym la urlong namar ka la ïakhaid khlem don ba thep kol pyrshah ïa ka Bangladesh ha ka Sngi Ba-ar ha Jawaharlal Nehru Stadium, Shillong.
Ha kane ka jingïakhun jong ka Group-C baroh ar kynhun ki la pyrshang ban ïakhun tyngeh naduh kaba sdang bad kane ka la pynhun ïa ki 14,900 ngut paidbah nongpeitkai kiba la pyndap smam ïa ka stadium baroh kawei.
Hadien shiteng kynta ka India ka la ïoh ïa kabu kaba biang lyngba u Farukh Choudhary uba la pynbuh bol ïa u Liston Colaco, hynrei um shym la lah na ka daw ka jingtbit u rangapkol ka Bangladesh u Mitul Marma. Haduh kaba kut jong ka kylla step baroh kynhun kim shym la lah ban pynkhih jar.
Hadien ba la bteng ïa ka jingïakhun jong ka kylla miet kine ki kynhun ki la pyrshang ban ïakhun tyngeh ha kaba ki la ïoh ïa ki katto katne ki kabu kiba biang khamtam ka India, hynrei kam shym la lah ban thep bad u Sunil Chhetri u la pynlehnohei ïa ka kabu ksiar ha ka minit kaba 84.
Ka Bangladesh ka la ïoh ban rah ïa ka bol ha kaba u Md Mojibor Jony u la ïoh ïa ka kabu kaba biang, hynrei u rangapkol ka India u Vishal Kaith u lah ban pyllait na ka jingshah thep. Haduh kaba kut kine ki kynhun ki la kut ha ka jingïakhaid.
Haba phai sha kawei pat ka jingïakhun jong kane ka group hapdeng ka Singapore bad ka Hong Kong ki la ïasam mar shi point, hadien ba kim shym la lah ban thep kol haduh kaba kut ka jingïalehkai.
