Shillong, Lber 25
Katba ka jingkheiñ sngi ka la nangjan na ka bynta ka ‘Legends Faceoff’, sa 8 ngut ki rangïalehkai phutbol ba kynthup ïa u Xavi Hernandez bad Michael Owen, ki la thmu ban ïashim bynta ha ka jingïalehkai hapdeng ka FC Barcelona bad ka Real Madrid Legends, kaba la buh ban long ha ka 6 tarik u Ïaïong ha DY Patil kaba ha Navi Mumbai.
Ki ban rung sha madan ban pyni ïa ki sap ïalehkai ha kane ka jingïakhun jong ki riewkhraw lait na u Hernandez bad u Owen ki long u Rivaldo, Javier Saviola, Pepe, Phillip Cocu bad u Christian Karembeu. U Hernandez u dei u nongïalehkai shapdeng bad uwei na ki nongpynbuh bol ba kynsai ha ka khanapateng jong ka phutbol. U la ïadon bynta ban khur nam lahduh haduh phra sien ha ka lympung La Liga bad saw sien ha ka UEFA Champions League ryngkat bad ka FC Barcelona. U la don bynta ruh ha ka jingjop jong ka Spain ha ka FIFA World Cup 2010 bad UEFA Euro 2008 & 2012.
“Nga la mad ïa ki katto katne ki jingïakhun ba khraw tam ha ka phutbol, bad mynta ngam lah khlem da ap shuh ban mad biang ïa ka hakhmat ki nongkyrshan ba sngewtynnad jong ka ri India ha Mumbai. Ngin long kiba la khreh na ka bynta ka miet kaba kyrpang!,” ong u Hernandez.
U Rivaldo kum nongjop ïa ka Ballon d’Or ha u snem 1999 bad u nongïalehkai ba kongsan na ka bynta baroh ar tylli ki nam lahduh jong ka Barcelona bad Brazil, u la ïarap ïa ka Barca ban jop ar tylli ki nam lahduh jong ka La Liga bad u la long ruh u bynta ba kongsan ka kynhun jong ka Brazil kaba la jop ïa ka FIFA World Cup ha u snem 2002.
“Ka phutbol ka dei shaphang ka jingsngewtynnad, ka jingtbit, bad ki por bym lah ban klet. Ha India, nga wan ban wanrah ïa kaba bha tam jong nga sha ka Legends Faceoff! Ngin sa iakynduh ha ka 6 tarik u Ïaïong,” la ong u Rivaldo.
U rangïalehkai shakhmat jong ka Argentina, u Saviola, u la pynkyndit ïa ki nongkyrshan ha Barcelona bad Real Madrid, ha kaba u la ïoh ïa ka nam na ka bynta ka jingsted eh bad jingïalehkai kaba itynnad bha. U la lah ban pynurlong ban khur jingjop ha ka La Liga (2004-05) na ka bynta ka Barcelona bad ban kyntiew ïa ka UEFA Cup (Europa League ba la tip mynta) bad ka Sevilla (2005-06).
U Owen, uba la ïoh ïa ka khusnam Ballon d’Or ha u snem 2001, u dei u nongïalehkai ba paw ha ka jingthep kol na ka bynta ka Real Madrid bad ka kynhun ïalehkai jong ka England. U la don lang ha ka kynhun ïalehkai jong ka Madrid kaba la jop ïa ka nam lahduh jong ka La Liga ha ka samoi ïalehkai 2004-05.
U Owen u la pynpaw, “Ka India ka don katto katne ki riew ïeid phutbol kiba sngewtynnad bha, bad nga khmih lynti ban rung sha madan na ka bynta ka Legends Faceoff. Ngin sa ïakynduh ha Mumbai!”
Kumjuh, u Pepe u la long u rangïalehkai ba paw ha ka jingïalehkai na ka bynta ka Real Madrid bad ka Portugal. U la jop lai tylli ki nam lahduh jong ka UEFA Champions League bad lai tylli ki khusnam jong ka La Liga ryngkat bad ka Los Blancos. U la long ruh shi bynta ba kongsan jong ka kynhun Portugal kaba la jop ïa ka UEFA Euro 2016 bad 2019 UEFA Nations League.
“Nga ju sngewtynnad ban ïalehkai ha ki jingïalehkai kiba don ha ka jingïakhaid bha, bad kane kan ym long kaba pher. Nga khmih lynti ïa ka miet jong ka phutbol kaba itynnad bha ha Mumbai!” la ong u Pepe.
U rangïalehkai shapdeng ka Netherlands u Cocu bad uba long u ba paw na ka bynta ka jingstad jong u ha ki kam ïalehkai, u la jop kawei ka nam lahduh ha ka La Liga bad ka Barcelona bad u la long ruh u bynta ba kongsan jong ka kynhun ïalehkai jong ka ri Netherlands ha ki por kiba la leit.
U Karembeu, u dei u rangïalehkai ba khlaiñ bha jong ka Real Madrid bad u la jop ar sien ïa ka UEFA Champions League bad u la don bynta ha ka jingjop jong ka France ha ka FIFA World Cup 1998 bad UEFA Euro 2000.
