Shillong, Lber 26
Ka kynhun ki rangïalehkai Under-17 jong ka Mynken Christian Secondary School ka la ïoh ïa ka jingjop kaba nyngkong ha ka lympung ïalehkai phutbol Indo-France 2025 kaba ar kaba la sdang ha Paris, hadien ba ka la lah ban pynliem noh ïa ka US Grigny FC da 4-0 kol ha ka Sngi Balang.
Kane ka kynhun ïalehkai hapoh ka jingïalam u Bah Bobby L. Nongbet (AFC A License) ka la lah ban pynpaw ïa ka jingtbit ha kane ka jingïakhun pyrshah ïa ka US Grigny FC, kaba don ha ka kyrdan R2 jong ka France.
Kane ka jingïalehkai kaba la long ha Grigny Stade, la ïohi ïa ka jingïalehkai kaba khraw khlem da khmih lynti ïa ka jingtbit jong katei ka kynhun kaba la mihkhmat ïa ka India bad ka la pynkyndit ïa katei ka kynhun ïalehkai jong ka France bad wat ki nongpeitkai ruh. Ka kynhun ïalehkai jong ka France kaba la paw bha na ka bynta ka jingïalehkai kaba khlaiñ bha, kam shym la khmih lynti ïa kum kane ka rukom ïalehkai na kynhun ïalehkai jong ka India, hynrei ki nongïalehkai ka Meghalaya ki la pyni ïa ka jingtbit kaba kyrpang, ka jingstet, bad ka jingïalehkai kaba itynnad bha.
Napdeng ki nongpeitkai la don lang ruh u Deputy Mayor ka tnat ïalehkai katei ka ri, u Deputy Mayor jong ka Grigny bad u Director ka tnat ïalehkai, ha kaba baroh ki la sngewtynnad bha ïa ka jingïalehkai jong ka kynhun ïalehkai ka Meghalaya. Ka jingstet ha ka rukom ïalehkai jong ki, ka jingkhlaiñ ha ka liang ban ïada ka la pynpaw ïa ka jingkiew shaphrang ka phutbol ha ri India.
Kane ka jingjop da 4-0 kol ka la pynshisha ba ki kynhun jong ka India ki lah ban ïakhun ha ka kyrdan kaba heh pyrshah ïa ki klob ba paw na Europe.
Hadien kane ka jingjop, ka kynhun ïalehkai jong ka Meghalaya mynta ka dang pynleit jingmut na ka bynta ka jingïakhun pyrshah ïa ka Versailles FC ka ban long mynta ka sngi. Ïa ka Versailles FC la tip kum kawei na ki klob ba khlaiñ tam ha France, kaba pynlong ïa kane ka jingïakhun kaba sngewtynnad ban peit.
