Shillong, Lber 28
Ka jingïalehkai jong ka lympung Inter Office Cum Corporate League T20 Cricket Tournament 2025 ba la pynïaid da ka East Khasi Hills Cricket Asso-ciation ka la poi sha ka semi final ha kaba ka jingïalehkai kaba nyngkong ha kane ka sngi ka 28 tarik Lber 2025 ka long hapdeng ka Combine SHG pyrshah ïa ka MLP Sohra. Ïa ka jingkynting pisa la jop da ka SHG bad ka la jied shwa ban tied ha kaba ka la ïoh 158 run na ki 20 over. U E Nathan A Diengdoh u la lah ban ïoh bun, kata 74 run, katba u Stevenson Syiem u la shim 2 wiket na ki 22 ron ha ki 4 over.
Ha kaba wan beh ïa ka thong ka MLP Sohra ka la ïoh tang 129 run na ki 20 over, bad u Albinus Syiemïong uba kham seisoh na ka kynhun u la kamai 49 run katba u Sunny Sten u la shim 2 wiket ha ki 4 over.
Haba kut ka jingïa-lehkai ka Combine SHG ka la jop da 29 run bad ïa ka nam ‘Player of the Match’ la ïohpdiang da u E Nathan A Diengdoh Ha ka jingïalehkai kaba bud ka la long hapdeng ka PHE Sohra Division pyrshah ïa ka Ribhoi Office Combine. Ka PHE Sohra Division hadien ba la jop kynting pisa ka la jied shwa ban tied nyngkong ha kaba ka la ïoh 162 run bad khyllem 8 wiket ha ki 20 over. U Sandy Kharshandi uba kham seisoh napdeng ki nongtied u la ïoh 65 run, katba u Wansuklang Shullai napdeng ki bol u la shim 4 wiket ha ki 4 over.
Ha ka pali ba-ar, ka kylla ban wan beh ïa ka thong ka Ribhoi Office ka la lah ban ïoh 163 run ha ki 13.5 over. U Probeson Bey u la ïoh 44 run na ki 23 bol, katba u Rahnam Nongspung u la ïoh shim 3 wiket ha ki 3 over. Kumta haba kut jong ka jingïalehkai ka Ribhoi Office Combine ka la jop da 4 wiket bad u Probeson Bey u la ïohpdiang ïa ka nam ‘Player of the Match’.
Kumta ka Combine SHG bad ka Ribhoi Office Combine kin ïakynduh ha ka jingïalehkai Final ka ban long ha ka 31 tarik Lber 2025 ha ka por 10:30 mynstep.
