Shillong, Lber 30
Ka Newcastle ka la ïoh ban lehkmen lyngba ka jingïoh ïa ka khusnam kaba nyngkong jong ka ha ki 56 snem ha kaba ka la pynlong da ka jingïaid paidbah lyngba ka nongbah, kaba la khring ïa ki 1,50,000 ngut ki nongkyrshan kiba la mih sha ki surok ha ka sngi Saitjaiñ.
Kane ka jingrakhe ka dei ka jingjop jong ki ha ka League Cup pyrshah ïa ka Liverpool ha ka 16 tarik mynta u bnai, kaba la pynkut noh ïa ka jingbym lah ban pynurlong ha ki 70 snem ha katei ka lympung.
Ka lynti ïaid lynti ka la sdang na Park stadium kaba ha St. James ha kaba la ïaid lyngba katei ka nongbah bad la pynkut ha Town Moor, ha kaba ki rangïalehkai lem bad ki khlur ïalehkai barim ki la shah pdiang burom halor rynsan.
Ki nongkyrshan ba shitrhem ka Newcastle, kaba long kawei na ki kynhun ïalehkai phutbol ba heh tam ha England, ki la pynkylla ïa ka nongbah ban ïarisa da ka jingkmen.
“Kane ka long shisha kaba phylla, kaba pynkhih jingmut shibun eh”, la pynpaw u manager u Eddie Howe. “Phi la ïoh ïa ki briew kiba la pyndait ha ki dieng sharak, na ki jingtei, nga kyrmen ba baroh ki long kiba biang. Ki briew ki la long kiba stad shibun. Ngam lah ban ai khublei ïa manla iwei pa iwei ha ka rukom ba ki la pdiang sngewbha ïa nga bad ïa ka iing ka sem jong nga bad nga sngewkmen ba nga la ai katto katne ka jingkmen ïa ki.”
U Alan Shearer, uba long u nongthep kol ba paw jong ka Newcastle bad u kapten barim jong ka England, u la pynpaw ïa ka jingkmen jong u da kaba ong, “Ka la long ka jingkmen ïa nga ha kine ki ar taiew ba la lah.”
