Shillong, Lber 30
Ka kynhun ki khynnah ïalehkai phutbol jong ka Myngken Christian Higher Secondary School ka la lah ban pynpaw ïa ka jingtbit da kaba ka la wan ha ka kyrdan balai ha ka lympung ïalehkai 2nd Indo-French Tournament, kaba la kut ha ka sngi Saitjaiñ ha Paris, France.
Ha kane ka jingleit shim bynta kaba la sdang naduh ka 24 tarik mynta u bnai, ka Myngken Christian ka la sdang ïa ka jingïakhun da kaba ka la lah ban pynliem ïa ka kynhun ïalehkai ba kynsai kaba na France ka Grigny FC da 4-0 kol. U Alicestar Thangkhiew u la lamkhmat da kaba u la lah ban thep ar kol bad ïa kiwei pat la thep da u Mebanlamlynti Masharing bad u Franky Dkhar.
Ha ka sngi kaba bud katei ka kynhun kaba na Bhoirymbong, Ri Bhoi District ka la ïakhaid da mar 1-1 kol pyrshah ïa ka Versailles FC.
Te kumta ïa ka kyrdan ba nyngkong bad ba-ar ha katei ka lympung la bat da ka Versailles FC bad ka Sarcelles FC. Katba ïa ka kyrdan basaw la bat da ka Grigny FC.
“Ka kynhun ka la lah ba kan ïalehkai bha, kampher wat ha kaba ka la hap ruh ba kan ïakhun bad ïa aireng bad ki kynhun kiba khlaiñ, pynban wat hapdeng ka jingtynjuh borbah, ki khynnah ki la aiti shisha ïalade met bad mynsiem, kaba la pynlong ïa ki ban ïoh bat ïa ka kyrdan kaba lai” la pynpaw u coach kane ka kynhun Bah Bobby.L. Nongbet (AFC ‘A” Licence) bad uba long ruh u District Sports Officer ka Ri-Bhoi District.
