Jowai, Lber 31
Ka Nongkhrohrim ka la long ka lahduh ha ka lympung ïalehkai Thadlaskeiñ Football League ba la pynïaid da ka Thadlaskeiñ Sports Association (TSA) hadien ba ka la lah ban pynliem noh ïa ka Niriang FC da 1-0 kol ha ka jingïakhun final kaba la long ha ka sngi Saitjaiñ ha Wahïajer Multi Sports Complex.
Kane ka nam jop ka la wan urlong lyngba u Helpmi Mukhim uba la ïoh thep kol ha ka minit kaba 28.
Ha ka jingïalehkai na bynta ka kyrdan balai ne 3rd Place la jop da ka Nongkhroh Krem hadien ba ka la pynliem noh ïa ka Heiboriongi FC da 5-0 kol.
Hadien ka jingïalehkai la sam ïa ki khusnam sha ka lahduh ka Nongkhrohrim kaba la ïohpdiang ïa ka song pisa kaba T. 1 lak tyngka, katba ka Niriang SC ka la ïoh T. 50 hajar, bad ka Nongkhroh Krem ka la ïoh T. 25 hajar.
La sam ruh ïa ki khusnam shimet sha ki rangïalehkai ha kaba ka khusnam Best Goalkeeper ka leit sha u Wanshan Kharsohnoh, Man of the Match la ïoh da u Helpmi Mukhim, Top Scorer ka leit sha u Rahbok Synnah. Kine baroh lai ngut ki dei na ka Nongkhrohrim.
Ïa ka khusnam sha ka kynhun kaba la rah nam lahduh la synñiang da u Symbud Myntri Rangbah ka Jylla u Bah Sniawbhalang Dhar, katba ka khusnam sha ka kynhun kaba wan ba-ar la synñiang da u Bah Wailadmiki Shylla, MLA ka Jowai bad u Bah Kmenlang Shylla u la noh synñiang sha ka kynhun kaba la wan ha ka kyrdan balai.
Ïa kane ka lympung ïalehkai la wan ban pynhap pyrda da u Bah Wailadmiki Shylla, MLA ka Jowai ha ka jingdonlang u MDC ka Wahïajer Bah Reformingson Lamare, u MDC ka Moodymmai Bah Jesse Suiam, u DSO ka West Jaiñtia Hills District Bah Khroobok Passah, u Principal ka North Liberty HSS Bah Richard B. Uriah bad kiwei kiwei.
