Shillong, Lber 31
Ki sengbhalang ba don hapoh ka Jylla ha ka jingïalang kaba la long ha ka Lah Sngi U Blei ki la pynkhie im biang ïa ka Confederation of Megha-laya Social Organisations (CoMSO) kaba don ha kawei ka shatri jong ki sengbhalang na Rilum Khasi-Jaiñtia bad Garo halor ka nongrim ban ïada ïa ki trai shnong na ka jingwan rung kyrthep ki briew na shabar.
Kine ki sengbhalang kiba don lang ha ka shatri jong ka CoMSO ki long ka Hynñiewtrep Youths’ Council (HYC), Jaiñtia National Council (JNC), Jaiñtia Students Movement (JSM), Confedera-tion of Ri Bhoi People (CoRP), ka Garoland State Movement Committee (GLSMC), United Achik Social Economic Forum (UASCJF), Achik Prog-ressive Association (APA) bad uwei u nongtrei mon sngewbha na rilum Garo, Cherion Momin.
Hadien ka jingïathir ha ka jingïalang kaba long ha Conference Room ka ICSSR, NEHU, Shillong ka CoMSO ka la rai ban pynkhlaiñ ïa ka jingdawa ban ïada ïa ki trai ri trai muluk, Khasi, Jaiñtia bad Garo na ka jingwan tyllep ki mynder ri na Bangladesh.
“Lada kam don kawei ka sur kaba mih lang na baroh ki trai ri trai muluk i kumba ka sur bad jingdawa jong ngi ka shu sahkut tang hangne ha rilum Khasi, Jaiñtia jong ngi. Ngi ithuh bad sngewthuh ïa ka jingma kaba ap ïa ngi ki trai ri trai muluk lada ngim shim ïa kino-kino ki lad ki lynti ban dawa na ka Sorkar ïa kita ki aiñ ban tehlakam ïa ka jingwan rung kyrthep jong ki briew kiba nabar, khamtam ki nong Bangladesh kiba la sdang ban rung sha kane ka Jylla jong ngi”, la ong u President ka HYC, Bah Roykupar Synrem haba kren sha ki lad pathai khubor.
U la ong ba ka jingïalang ka la rai ban dawa pyntreikam ïa ka Inner Line Permit (ILP) kaba dang sahteng haduh mynta. U la ong ba lada ka Sorkar India bad ka Sorkar Jylla kam lah ban ai ïa ka ILP ka dei ban ai ïa ka MRSSA, 2020.
Kawei pat ka mat ba ka CoMSO ka la rai ban dawa ka long ba ka Sorkar India kan pynkylla noh ïa ka Schedule Tribe Order 1950 kaba ithuh ïa ki trai riewlum ha kane ka Jylla, namar ha u snem 1950 ym pat ïoh satia ïa ka Jylla Meghalaya, hynrei dang dei lang hapoh ka Jylla Assam, hynrei ha ka por ba wanrah ka jingpynkylla ïa ka ST Order ha u snem 1976, ka Sorkar India ka la shu shim ïa kajuh ka ‘Order’ jong u snem 1950, kaba la ithuh lut ïa baroh ki riewlum ha kane ka Jylla khlem kdew tang ïa ki Khasi, Jaiñtia bad Garo.
U la ong ba kane ka la pynduh ïa ki hok jong ki trai shnong kiba dei ki Khasi-Jaiñtia bad Garo, wat ban shah knieh ka khyndew ka shyiap bad ka khaïi-pateng ha kiwei ki riewlum, katba ki Khasi, Jaiñtia bad Garo kim ïoh ïa ka jingithuh kum ki riewlum sha kiwei ki Jylla.
U Bah Synrem u la ong ruh ba ka kynhun kan shim ruh ïa ka mat halor ka jingpynkylla ba 126 ïa ka Khyrnit ba Hynriew hapoh ka riti synshar ka ri India.
