Shillong, Lber 31
Ka lympung ïalehkai Super Division Shillong Cricket League 2024-25 ba la pynïaid da ka Shillong Cricket Association ka la poi sha kaba kut ha ka Lah Sngi U Blei, ha kaba ka Sputnik CC ka la long ka lahduh hadien ba ka la lah ban pynliem noh ïa ka Rangkynsai da 3 wiket.
Ha kane ka jingïakhun final kaba la long ha madan Polo Shillong, ka Sputnik hadien ba jop kynting pisa, ka la ailad shwa ïa ka Rangkynsai ban tied nyngkong ha kaba ka la ïoh 217 run bad shah pynhap 10 wiket ha ki 45 over. Kane ka la wan urlong lyngba ka jingïalehkai bha u Kishan Lyngdoh uba la lah ban khyurwit haduh 98 run na ki 91 bol bad u Ram Gurung u la ïoh 29 run na ki 61 bol. Katba u Swarajeet Das u la shim 3 wiket na ka bynta ka Sputnik.
Haba wan shimti ïa ka pali kaba ar ka Sputnik ka la lah ban kynjoh sha ka thong da kaba ïoh 220 run bad shah pynhap 7 wiket ha ki 43.5 over. U Asif Khan u la tied 49 run na ki 79 bol bad u Gurinder Singh u la ïoh 46 run na ki 44 bol. Katba u Ajay Duhan u la shim 3 wiket bad 2 wiket da u Sanvert B. Kurklang. Ïa ka nam Player of the Match la ïohpdiang da u Swarajet Das uba la tied 11 run bad shim 3 wiket.
