United Nations, Iaiong:
Ha kane ka sien leit hiar thma biang jong ka Israel sha nongbah Gaza, la don haduh palat 322 ngut ki khynnah kiba khlad bad 609 ngut kiba mynsaw namar ka jingleit thombor jong ka Israel sha katei ka nongbah hapoh jong kine shiphew sngi.
Kitei kiba khlad bad mynsaw ki kynthup ruh ia kito ki khyllung- khynnah kiba la khlad ne mynsaw ha ka por ba ka Ai Nasser Hospital ka la shah thombor ha ka 23 tarik mynshem bnai.
Ka UNICEF ka la pyntip ruh ba bun na kitei ki khyllung- khynnah ki la shu poi sakma na la ki jong ki kmie- ki kpa bad na ki bahaiing-bahasem jongki bad ia mynta hi, ki bor pyniaid ka nongbah Gaza bad ki briew jong ka tnat iarap ba dei khmih hapoh nongbah Gaza, ki dang pynshong bad sumar ia kitei ki khynnah baroh hapoh jong ki iing dara kiba shu shna tang ban shong shipor.
Namar hadien ka jingsangeh thma ba ar bnai, ka Israel ha kane ka sien pat ka la sdang biang ia ka jingleit thombor sha nongbah Gaza naduh ka 18 tarik jong u Lber bad naduh katei hi ka sngi, ka la sdang ban phah leit tur biang ia ki shipai jongka kumba ju long ha ki bnai ba la leit.
Hynrei, la ong ba kane ka thma ka la ktah jur bha khamtam ia ki khyllung- khynnah, naba ki la shu im hapdeng ka jingtieng- jingsyier bad ka jingmut-jingpyrkhat jongki ruh ka la dap da ka jingsheptieng bad kim long shuh kumba ka jingmut-jingpyrkhat jong kiwei pat ki khynnah kiba biang.
Ka UNICEF ka la iathuh ruh ba hadien 18 bnai jong ka jing-iakhun thma hapdeng ka Israel bad ka Hamas, ki don palat 15,000 tam ki khyllung-khynnah kiba la shu duh ei ia ka jingim bad kumba 34,000 ngut pat kiba mynsaw. Nalor kata, palat 1 Million ngut pat ki dei kiba la sakma bad poi phetwir bad ki la hap ban im khlem ki nongpeit- nongsumar.
Namarkata, ka tnat UNICEF ka la kyntu ba dei ban pynkut noh shi syndon ia ka jingleit hiar thma jong ka Israel sha nongbah Gaza bad ba ka Israel ka dei ban ailad ban pynpoi noh kloi ia ki mar-bam bad ki lad jingïarap kiba ki tnat na kylleng ka pyrthei ki kwah ban phah bad ban pynpoi sha ki paidbah nongshong shnong jong ka nongbah Gaza namar khlem ka um, ki jingbam bad ki dawai- dashin, kumno yn pynim ia kitei ki khynnah bad ki paidbah jong ka nongbah Gaza, kiba la shah ktah jur namar ka jingleit hiar thma ba khlem sangeh jong ka Israel sha Gaza Strip.
