Shillong, Ïaïong 01
Ka Meghalaya Police (MLP) ka la long ka lahduh ha ka Shillong Cricket League Inter Office 2024-25 ba la pynïaid da ka Shillong Cricket Associa-tion (SCA), hadien ba ka la lah ban pynliem noh ïa ka Raj Bhavan da 13 run ha ka Sngi Ba-ar.
Ha kane ka jingïakhun final kaba la long ha madan Polo, ka Raj Bhawan kaba la jop kynting pisa ka la ailad shwa ïa ka MLP ba kan tied nyngkong ha kaba ka la ïoh 129 run bad shah pynhap 5 wiket ha ki 20 over. U Ganesh Sahani u la tied 31 run na ki 24 bol bad u Kamal Thapa u la ïoh 24 run na ki 16 bol. Katba u Robin Chatteri u la shim 2 wiket na ka bynta ka Raj Bhavan.
Haba wan beh ïa ka thong ba la buh da ka liang pyrshah, ka Raj Bhawan ka la ïoh tang 116 run bad shah pynhap 10 wiket ha ki 19.1 over. U Sunil u la tied 31 run na ki 22 bol bad u Bijit Yadav u la ïoh 28 run na ki 37 bol. Katba u Pankaj Roy u la shim 4 wiket bad ïa ki 3 wiket da u Ganesh Sahani. Ïa ka nam ‘Player of the Match’ la ïohpdiang da u Ganesh Sahani uba la tied 31 run bad shim 3 wiket.
