Shillong, Jylliew 26
Ka Mawpdang SC ka la pynjem khnap ïa ka Golflink SC da 8-1 kol ha ka pre-quarter final jong ka lympung ïalehkai SSA U-20 4th Division Football League 2026 kaba la long ha ka sngi Thohdieng bad u Banaijingshai Kharkongor u la khur ïa ka hat-trick.
Kane ka jingïakhun ka la long kaba noh shilliang namar ka Mawpdang ka la long kaba khlaiñ bor bad ka la ailad tang shi kol ïa ka Golflink ba kan pynphai.
Ha kane ka jingïakhun jong ka pre-quarter final kaba la long ha SSA Stadium kaba ha Polo, ka Mawpdang ka la lah ban ïalehkai bha naduh kaba sdang ha kaba ka la ïoh ban thep mar saw kol ha ka kylla step bad ha ka kylla miet.
Ïa kine ki kol kiba ka la thep ha ka kylla step la thep da u Nameshemphang Pdahsiej (23), Samborlang Langte (29) bad u Banaijingshai Kharkongor (35 & 36). Katba ha ka kylla miet ka la thep biang lyngba u Banaijingshai (77), Marbiang Kharbhih (72 & 78) bad u Samborlang (80+2). Katba ka Golflink ka la pynphai kylla shi kol lyngba u Ribanshan Wahlang (50).
Haba phai sha kawei pat ka jingïakhun hapdeng ka Mawñianglah Youth SC bad ka Ïaitylli SC ki la ïakhaid mar 2-2 kol.
Ka Mawñianglah Youth ka la thep kol nyngkong lyngba u Nicky Mawthoh ha ka minit kaba 22 bad u Iborlang kharkongor (45), hynrei ka Ïaitylli ka la pynphai kylla lyngba ka jingïarap pynthep da u rangïalehkai ka Mawñianglah u Bantyngshaiñ Nongsteng (62) bad kawei da u Kitbok Maskut (80).
Ka jingïalehkai pre-quarter final mynta ka sngi Saitjaiñ kan long hapdeng ka Thynroit SC pyrshah ïa ka Laitlyngkot SC ha ka por 1 baje mynsngi bad ka Phir Kurbah MS&CC ïa ka Seila Sap F&CC ha ka por 4 baje nohphai sngi.
