Shillong, Jylliew 26
Kan long ka sien kaba lai ba ka nongbah Shillong kan ïoh biang ban pynlong ïa ka lympung ïalehkai kaba la rim tam ha ka dewbah Asia, ka 135th Durand Cup ka ban sdang naduh ka 25 tarik u Naitung mynta u snem.
Kin don 24 tylli ki kynhun ki ban ïashim bynta ha kane ka lympung, kynthup ïa ar tylli ki kynhun kiba nabar ri.
Nalor ka Shillong, kiwei pat ki nongbah ki ban pynlong ïa kane ka lympung ki long ha Kolkata, Ranchi, Guwahati bad Imphal. Kane kan long ka sien kaba nyngkong eh ban pynlong ha Ranchi. ïa ka jingïakhun final yn pynlong ha ka 23 tarik u Nailar.
Watla ka Jawaharlal Nehru Stadium kaba ha Polo ka dangdon hapdeng ka jingmaramot pynbha naduh ka tnum kaba dei ka bynta jong ka VIP Gallery, ki bynta jong ka jaka khreh ki nongïalehkai bad katto katne ki bynta jong ki jaka shong ki paidbah riew ieit phutbol jong katei ka stadium, hynrei na ka liang u Director ka tnat ïalehkai u D.D Shira u la ong ba ka Durand Cup kan ïaid beit shakhmat namar kane ka jingmaramot pynbha ka dei shi bynta ka jingpynkhreh ïa ka 39th National Games 2027 ka ban long ha kane ka Jylla.
“Ngi sngewkmen ba nalor ka Shillong Lajong, ki la don sa ar tylli ki kynhun ïalehkai ka nongbah. Ka Nongkseh SS&CC kaba long ka lahduh ha ka Meghalaya State League 2026 lem bad ka Langsning FC, kaba la wan ba-ar,” u la bynrap.
“Kumba phi ïatip ba ka Jylla kan pynlong ïa ka 39th National Games ha u snem ban wan, te kumta ki don shibun ki jingmaramot pynbha ha kylleng jong ka stadium. Hynrei ngi kyrpad ïa ki paidbah ba kin long kiba ïai shah bad ka madan ïalehkai ka long kaba biang ban pynlong ïa ka Durand Cup bad khmih lynti ban pynlong ïa ka, kaba jop.”
Lah ban pynkynmaw, ka Shillong Lajong ka dei ka kynhun kaba la shah rem noh ha ka semi final jong u snem ba la lah, ha ka NorthEast United, kaba la rah ïa ka nam lahduh.
Ïa kane ka lympung yn pynïaid da ka Eastern Command jong ka Indian Army ha ryngkat ka tnat ïalehkai jong ka Sorkar Jylla.
