Jowai, Ïaïong 02
Ka Phramer CC ka la ïoh ïa ka jingjop ha ka lympung ïalehkai District Cricket League ba la pynïaid da ka West Jaiñtia Hills District Cricket Association (WJHDCA) hadien ba ka la lah ban pynliem noh ïa ka Evergreen Mukhla Mission SC da 118 run ha ka Sngi Balang.
Ha kane ka jingïakhun ka Evergreen Mukhla Mission SC ka la jop kynting pisa bad shimti shwa ban kawang bol nyngkong. Kumta ka Phramer SC haba wan shimti ban tied ka la ïoh 223 run bad shah pynhap 9 wiket na ka 35 over.
Haba wan beh ïa ka thong ba la buh da ka liang pyrshah, ka Evergreen Mukhla Mission SC ka la ïoh tang 105 run bad shah pynhap 10 wiket ha ka 23.5 over. U Hamjngai Lyngdoh jong ka Phramer SC u la ïohpdiang ïa ka nam ‘Man of the Match’ hadien ba shim 3 wiket na ki 5 over.
Ka jingïalehkai ha ka Sngi Palei kan long hapdeng ka Lion Sports & Youth Affairs pyrshah ïa ka West Jaiñtia Police CC ha ka por 9 baje mynstep.
