Kuala Lumpur, Iaiong:
Ka jingbthei kaba sawa jam ka la mih na ki thaiñ khappud jong ka Kuala Lumpur ha ka Sngi Ba-ar, ha kaba uwei tyndong lyer ‘Gas Pipeline’ u la bthei ha kawei na ki jaka sam lyer jong ka Malaysia kaba don ha Petronas. Kane ka la pynlong ia ki bor pyniaid ban pynkynriah noh ia ki nongshong shnong na katei ka thaiñ ba marjan, ban pynkynriah noh ia ki shipor bad palat 100 ngut ki riew paidbah ki la mynsaw na katei ka jingjia ha katei ka sngi bad 60 tam napdeng jong ki la ioh ban pynkit noh sha ki jaka sumar na ka bynta ki jingsumar ba kyrkieh. Kane ka jingbthei ka la jia ha ka por katba dang don ka jinglehniam ‘Eid’ hajan ka nongbah ba pdeng jong ka Malaysia. Ia mynta hi, la ong ba ym pat shym la ioh jingtip ban don kiba khlad noh syndon na katei ka jingjia hynrei ka jingdon jong kiba mynsaw pat ka la bun bad ka la kham shyrkhei. Watla katta, la ong ba palat 50 tylli ki iingbriew ki la julor bad shah ktah na katei ka jingbthei ha katei ka sngi.
Katkum ki video bad ki dur ba la saphriang paidbah ha ki rynsan ‘Social Media’, la iohi ia ka tdem kaba rben bha kaba kiew shalor suiñ kum ka dur jong u tit ‘Mushroom’ ha ryngkat ka tdem kaba kat u lyoh khyndew uba rben bad ba ioh ngaiñ- ngaiñ ba la mih na katei ka jaka kaba bthei.
Katei ka jingbthei, kaba la lah ban iohi da ki kilomitar, ka dei namar ka jingtuid jong u pipe gas, uba don ia ka jingjrong kumba 500 meter (1,600 phut).
Ka tnat pynlip ding ka la ioh ia ka jingpan jingïarap ba kyrkieh halor katei ka jingbthei ha ka por kumba 8:10 baje mynstep.
Ki khubor ki la iathuh ruh ba katto katne ki iing ki la kem ding ha katei ka jingbthei kaba shyrkhei bad ki don ki riew shimet kiba la sahkut hapoh ki thylliej ding, hynrei ym pat lah ban ioh ia ka jingkheiñ kaba tikna.
Kumta la ong ba katei ka jingpluh, ka la pynlong ïa ki paidbah ban phet noh na ki ïing ki sem jong ki ha ka por ba dang long ka jingleh niam ‘Eid’ namar ba ka la kem ding shaduh ki jaka shong jaka sah ba marjan bad ka Kuala Lumpur kaba bun ki paid nongshong shnong Muslim.
Haba iadei bad kane, ka tnat pynlip ding jong katei ka nongbah, ka la pyntip ba ka dang ialeh ban wad bniah ban lap ia ka daw jong ka jingkem ding katei ka jaka ha katei ka sngi bad ba yn pynshitom ruh lada don kiba thmu khnang ne don kti ban leh ia katei ka kam.
