Shillong, Ïaïong 04
Ka Red House ka la ïoh rah ïa ka Trophy kum ka lahduh jong ka Inter House Sports Meet 2025 ba ar sngi ba la pynlong da ka Phudmuri Presbyterian Higher Secondary School, Mawlai Phudmuri ha madan heh Stadium ha ka 3 bad 4 tarik u Ïaïong, 2025.
Katba ka Blue House ka la wan ba-ar bad ka Yellow balai.
Ka Red House ka la ïoh ruh ïa ka nam Best Discipline Team.
Ha kane ka sngi la sam ruh ïa ki khusnam Best Athlete sha ki ‘rang bad ‘thei kynsai ha ka liang mareh. Ha ka Sub Junior ki shynrang la ïoh da u Hamebantei Sohtun (Blue House) bad na ki kynthei la ïoh da ka Yowanrika Kharbuli (Yellow). Na ka Junior la ïoh da u Bankyrshan Wahlang (Red) na ki shynrang bad ka Pdianghun Christine Jyrwa (Red) na ki kynthei, katba na ka Senior pat la ïoh da u Imbanroi Thangkhiew (Red) na ki shynrang bad ka Wandahun Madur (Blue) na ki kynthei.
Ha kane ka jingïakob la phiah sha lai bynta, Sub Junior, Junior bad Senior kiba ïashim bynta ha ka tan tyllai (Tug of War), mareh bad kiwei-kiwei. Ïa ka March Pass pat la ïoh rah da ka Green House.
Ha kane ka sngi kut la wan sakhi lang da u MDC Mawlai Bah Eddieson Kharumnuid kum u kongsan ha ka jingdon ryngkat Principal Kong Phila Rynjah, Pastor, Tymmenbasan, ki kmie ki kpa bad kiwei kiwei.
Haba ai jingkren u MDC u la pynpaw ïa ka jingkmen ba kane ka skul ka la pynlong ïa ka Inter House bad u la ai khublei ruh ba ki la khot sngewbha ïa u sha kane ka jingïalehkai ba ka skul ka pynïaid.
“Nga kmen ban ïohi ïa ki khynnah ba ki ïashim bynta shitrhem ha ka jingïalehkai sport bad kane ka pynkmen ruh ïa nga,” ong u MDC Mawlai. “Ka pule puthi ka long kaba donkam bha bad wat ailad ba ka jingduk kan khanglad ban pynurlong ïa ka jingphohsniew jong phi ha ka jingim,” la bynrap u MDC.
Katba ha ka sngi plie pyrda la don lang u Bah H. Thabah, OC Mawlai Police Station kum u kongsan.
