Shillong, Ïaïong 04
Ka Sports Authority of India (SAI) ka la sdang ïa ka jingpynkhreh na ka bynta ka Olympic 2036 namar ba ka ri India kan don 10 tylli ki jaka ai jinghikai na ka bynta kane ka lympung. Katkum ki tyllong khubor ba la ïohlum la ong ba man la ka centre kan don kawei-pa-kawei ka jait jingïalehkai ryngkat 150 ngut ki nongïalehkai hangta. Ïa ki nongïalehkai yn jied na ka Khelo India. Ka Khelo India Youth Games ka ban long ha Bihar naduh 4 haduh 15 tarik Jymmang ha kaba palat 10,000 ngut ki nongïalehkai kin ïashim bynta. Ki jingïalehkai kin long ha ki nongbah bapher-bapher ha kylleng ka Bihar bad kan don 28 tylli ki jait jingïalehkai baroh.
Ka Indian Olympic Association (IOA) ka la pynpaw ïa ka jingsngewtynnad ban ïoh pynïaid bad pynlong ïa ka 2036 Olympic Games, da kaba shim ïa ka sienjam ba skhem bad nyngkong eh ha ka jingthmu kaba thrang hadien bun bnai.
Palat 10 tylli ki ri, kynthup ïa ka Qatar bad Saudi Arabia, ki la pynpaw ïa ka jingkwah ban pynlong ïa ka Olympic ha u snem 2036, wat la ym pat lah ban tip katno tylli ne kino kiwei pat ki ri kiba la leh ïa kata da kaba pynbna paidbah.
Ka rai halor ban pynïaid ïa ka Olympic 2036 kan dang shim por bad ym pat tikna ba kan lah ban wan shwa u snem 2026.
