Shillong, Ïaïong 06
Ka kynhun ïalehkai phutbol ka India ka la hiar shi kyrdan na ka bynta ban wan ha ka kyrdan kaba 127 ha ka pyrthei, kat kum ka jingpyllait da ka FIFA na ka bynta ki kynhun ïalehkai jong ki ri ka pyrthei.
Kumba ka paw ka India ka la ïakhaid khlem don ba lah ban thep kol pyrshah ïa ka Bangladesh ha ka AFC Asian Cup qualifying kaba la long ha Lber mynta u snem ha ka nongbah Shillong. Lyngba kane ka jinglah ban pynïakhaid ka la pynlong ïa ka Bangladesh ban jam ar kyrdan na ka bynta ban don ha kaba 183.
Katei ka kynhun jong u Manolo Marquez ka la jop tang shisien na ki 13 sien ïakhun naduh kaba sdang jong u 2024. Kane ka jingjop ka dei pyrshah ïa ka Maldives ha ka jingïalehkai paralok kaba la long ha ka nongbah Shillong.
Katei ka kynhun ka la khmih lynti ban ïalehkai bha ha ka sien kaba lai ha ka Asian Cup qualification. Te kumta ka India ka la shah kynthup lang ryngkat ka Bangladesh, Singapore bad ka Hong Kong kiba don ha ka Group-A.
Haba phai sha ka lahduh jong ka World Cup ba la lah, ka Argentina ka la ïai bat ïa ka kyrdan ba hakhlieh, kata hakhmat ïa ka Spain bad ka France kiba la don ha ka kyrdan ba-ar bad balai.
