Shillong, Ïaïong 06
U khlur ïakura jong ka ri India, Hitesh Gulia u la khur ïa ka takma ksiar ha ka 70kg jong ki shynrang jong ka World Boxing Cup 2025 kaba la kut ha ka sngi Saitjaiñ ha Brazil.
Ha katei ka jingïakura, u Gulia u la ïoh ban bat ïa katei ka kyrdan hadien ba u lah ban jop da ka walk over ïa u rangïakura ka liang pyrshah u Odel Kamara ha ka jingïakhun final.
Kumba ka long mynta u Gulia, uba long uba nyng-kong eh na India ban jam sha ka final ha ka World Boxing Cup 2025, un leit phai sha la ïing ryngkat ka takma ksiar.
Kham hashwa u Gulia u la lah ban pynliem ïa u rangïakura Olympic uba na France u u Makan Traore da 5-0 ha ka jingïkhun semi final.
Uwei pat u rangïakura jong ka ri u Abhinash Jamwal u la khur ïa ka takma rupa hadien ba u la shah rem noh ha ka final jong ka 65kg ki shynrang. Ha kane ka jingïakhun final u Jamwal u la shah rem noh ha u Yuri Reis uba na Brazil da 0-5.
Nalor ka takma ksiar bad rupa, ka India ka la pynkut ïa kane ka lympung da kaba khur ïa saw tylli ki takma rnong lyngba u Jadumani Singh (50kg), Sachin Siwach (60kg), Vishal (90kg) bad u Manish Rathore (55kg).
Ha katei ka World Boxing Cup 2025 kaba la long ha Brazil, u Torak Kharpran u la long uwei napeng ki san ngut ki coach jong ka ri India. Ha ka jingshisha ka India ka la phah haduh 19 ngut ki nongïakura sha katei ka rynsan ïakura, hynrei tang hynriew ngut kiba la lah ban khur takma.
