Mandalay, Iaiong:
Ka tnat National Disaster Response Force (NDRF) jong ka India ka la leit ban pyndep ia ka thong ‘Operation Bharma’ ryngkat ki jingthmu ban leit pyllait im bad ban leit rah ia ki jingïarap sha ki paidbah nongshong shnong ka Myanmar.
La ong ba ka Myanmar ka dang ïakhun ban pynbit- pynbiang ia la ki paidbah hadien ka jingshah lynshop ha u jumai-bah uba jur haduh 7.7 Magnitude uba la pynkhynñiuh ia katei ka ri ha ka 28 tarik u Lber ha kaba ka ri India ka long ka ri kaba nyngkong eh kaba la kloi ban leit ai jingïarap ia kane ka ri ha kum kane ka por.
U Deputy Commander ka NDRF, Kunal Tiwari, uba dang peit-thuh ia ka jinglong jingman bad ka jingbud-dien bad jingpyllait im ia kitei kiba ngat ha katei ka jingjia, u la ong ba ka tnat kan dang peit-thuh ia ka jinglong-jingman baroh ban ioh pyllait im lada don kiba dang sahkut ha kito ki jaka ba la julor bad ba la twa.
U Tiwari u la pyntip ruh ba katei ka kynhun jong ka NDRF ka don ia 80 ngut ki dkhot, kiba la ioh jingkyrshan na saw tylli ki jaka pyntbit ba kynsai ha ryngkat ki tiar pyndonkam kiba la shna kyrpang.
Wat hapdeng ki jingeh kiba ka tnat kan hap ban ïaid lyngba hapdeng ka jingleit jingïarap jongka sha katei ka ri, u Tiwari u la pynpaw ia ka jingshlur bad jingsngew skhem ba ka tnat kan lah ban iarap ia ki paidbah nongshong shnong jong katei ka ri, kiba la shah ktah jur ha utei u jumai.
