Shillong, Ïaïong 07
U Working President ka Meghalaya State Olympic Association (MSOA) Bah John F. Kharshiing u la aiti ïa ka Meghalaya Sports Policy 2019 sha ka Principal ka skul Loreto Convent, ka Sister Mable P. Rudun ha ka sngi pyn-kut noh ïa ka Annual Sports Day kaba la long ha ka 4 tarik mynta u bnai ha SAI STC, Shillong.
Kane ka lympung ïalehkai ba shisien shi snem ka long kum ka dak ban kyntiew ïa ka jingsngew -thuh bad ka jingpynïasoh ïa ka jingïalehkai hapdeng ki jaka pule ha ka jylla.
Ha ka jingkren jong u Bah Kharshiing u la pyntip lang shaphang ki bynta jong ka Meghalaya Sports Policy 2019, kaba la pynbna da ka Sorkar Meghalaya ban thaw ïa ka rukom treikam kaba ryntih bad kaba kynthup ïa baroh na ka bynta ban kyntiew ïa ka jingïalehkai kynthup ïa ka jingthung ïa ki nonghikai ïalehkai kiba tbit kiba don ki kyrdan pule (qualified Physical Education Teachers-PET). U la kdew ba wat hapdeng ki jingeh kiba bun ka polisi ka la wanrah ïa ki katto katne ki jingjop bad ki jingthmu kiba kongsan.
Kine ki kynthup ïa ka jingpynkylla ïa ka Megha -laya Service Rules, kaba pynlah ïa ki jingai jing-kyrshan kiba kham kyrpang ha ka jingïalehkai ïa ki nongïalehkai kiba tbit kiba dei ki nongtrei sorkar. Ka jingpynurlong biang ïa ka Meghalaya Games hadien 16 snem da ka jingjop ban pynlong ïa kane ka lympung kaba lai ha u snem 2020, kaba saw ha u snem 2022 ha Shil-long, kaba san ha u snem 2024 ha Tura, West Garo Hills District bad kaba hynriew ha u Kyllalyng-kot 2025 ha Jowai, West Jaiñtia district.
Ka jingpynlong ïa ka jingïalehkai Olympic jong ka thaiñ shatei lammihngi kaba ar ha u Nohprah 2022 ha Shillong, kaba la wanrah bad pynmih ïa ka jingtbit ha ka jingïalehkai na ka Jylla. Ka jingpynrung ïa ki khusnam pisa bad ki jingai bai bam shi snem na ka bynta ki nongjop takma ha ka kyrdan jong ka jylla bad ka ri.
Ka jingpynlong ïa ka Talent Identification Program (TID-3) kaba 3 na ka bynta baroh ki jait jingïalehkai ha ryngkat ka jingïatreilang bad ka tnad ïalehkai ka Sorkar Jylla kaba dang don hapdeng ka jingpyntreikam bad kaba la jan kut ha kaba la pynlong ka jingkhmih bniah ïa ki shiphew hajar ngut ki khynnah ha kylleng 12 tylli ki district bad dang bud sa ka bynta ïa ki ar spah ngut ki khynnah kiba la ïoh ïa ka kyrdan ba hakhmat eh bad kaba kine ki ar spah ngut ki don hapoh ka jingkhmih ka jinghikai bad jingïalehkai kaba shisnem, bad ha ka jinghikai pynkhlaiñ met hapoh ka jingpeit bniah da ki nongïalehkai Olympic barim. Ki nongïalehkai kiba la shah jied ki la don ha ka Super Elite bad ki la sdang pyni ïa ka jingkiew kaba bha ha baroh ki liang.
U Bah Kharshiing u la pynpaw ïa ka jingsngewnguh kaba khraw ïa u Myntri Rangbah ka Jylla Conrad K. Sangma bad u Myntri ka tnad ïalehkai ka Jylla Bah Shakliar Warjri halor ka jingshimkhia jong ki ban kyntiew ïa ki kam ïalehkai. U la ai khu-blei kyrpang ïa ka jingpyrshang jong ki ban pynthikna ban pynurlong ïa ka 39th National Games 2027 ha jylla Meghalaya, ka ban long ka jylla kaba lai ha ka thaiñ shatei lammihngi, hadien ka Mani-pur (1999) bad ka Assam (2007). U la ban jur ba kane ka long ka kabu kaba khraw kan pynkylla ïa ka jinglong ïalehkai jong ka Meghalaya bad kan sa ai mynsiem ïa ki pateng ban wan.
Ha ka khubor ba kyrpang sha ki nongpynïaid skul, u Bah Kharshiing u la kyntu ïa ki bor pynïaid skul ban pynneh pynsah bad ban ïasam ïa ki jingthoh ka jinglah jong ki nongïalehkai ha ki jingjngai ha ka kynthih bad ka por mareh ha ki por ïalehkai bad ban pyntip lang sha ka MSOA, namar ki jingtip bad ki jingthew ki long kiba kongsan bha ban buddien ïa ka sap bad ka jingkiew jong ki samla. U la ban jur ba manla ka jinglehkai ka don jingmut bad ka lah ban long ka jingsdang jong ka jingïaid lynti jong ki nongïalehkai sha ka jingkhraw.
