Washington, Iaiong:
U Donald Trump, ha ka Sngi Nyngkong u la pynpaw ba u khmih lynti ba u President ka Russia Vladimir Putin un “pyndep ïa la ka bynta” jong ka jingïateh soskular ban pynkut noh ïa ka thma ha Ukraine. Kane ka long hadien ba une u President jong ka America u la pynpaw ïa ka jingartatien halor ka jingkular jong ka Russia.
“Nga kwah ban pynthikna ba un bud ryntih”, la ong u Trump ha ki nongthoh khubor ha White House. “Nga tharai ba un leh katkum kaei kaba u la kular ia nga, bad nga tharai ba un sa pyndep ia la ka bynta jong ka jingiateh.”
U Trump, ha ka Sngi U Blei, u la kynthoh ïa baroh ar ngut ki President jong ka Russia bad Ukraine, u Vladimir Putin bad u Volodymyr Zelensky, katba u dang pyrshang shitom ban wanrah noh ia ka jingiasuk hapdeng jong kitei arliang mamla.
U Trump u la ïathuh ha ki nongthoh khubor ba u “bitar jur” ïa u Putin namar ba u la buh jingkylli ïa ka jingshaniah jong u Zelensky kum u briew ban ïakren bad u la khot ïa ki nongïalam ba thymmai ha Ukraine.
U Putin ha kaba sdang jong u Lber, u la kyntait ruh ïa ka jingtyrwa jong ka US ban sangeh thma khlem jingteh ha Ukraine, kaba u Zelensky u la mynjur.
Ha ka Sngi U Blei, ka nongthoh khubor jong ka NBC News, ka Kristen Walker, ka ong ba u Trump, u la phone ïa ka, ban pynpaw ba u la bitar shisha haduh katta katta ïa u Putin bad u la byrngem ruh ban buh khajna ïa ki kompeni kiba ïadei bad ka umphniang jong ka Russia.
Hadien une u nongïalam jong ka US u la pynphai ïa ka jingbitar jong u sha u Zelensky, da kaba maham ïa u ba ka Ukraine kan don ïa ki jingeh kiba khraw lada ka ïoh ïa ki kjat ba khriat halor ka jingïateh kular ban soi ïa ka hok marpoh khyndew sha ka America.
Katba, ka Russia pat ha ka sngi Nyngkong ka la ong ba u Putin u dang plie lad ban ia kren bad u Trump.
