Washington, Iaiong:
U heh nongseng jong ka Microsoft, Bill Gates, ha kane ka por u la pynpaw ba un ym aiti ne ai pateng ia ka spah bad ki jingdon-jingem jong u baroh sha ki khun- ki kti jong u. Hynrei u la ong ba ki dei ban trei shitom bad ban pynriewspah hi da lade ia lade ym ban shu ioh pateng da kaei kaba u la pynioh lypa.
Namar u la ong ba ki bun ki iing- ki sem kiba kham riewspah, ki kwah ban pynhiar pateng ia ka spah- ka phew jong ki ha ki khun- ki kti bad ki pateng ki ban wan jong ki. Hynrei u la ong ba um kwah ban bud ia kitei ki rukom kiba la ju iohi baroh shi katta. Pynban u la ai mynsiem bad hikai ia ki khun- ki kti jong u ba ki dei ban trei shitom hi da lade bad kaei kaba u lah ban pynbiang ia ki, ka dei ka rukom im bad ka pule-puthi kaba bha tam. Hynrei haba iadei bad ka spah lane ki jingdon- jingem jong u baroh, un nym aiti pateng ha ki, hynrei kin ioh tang hapoh jong ka 1% na ka spah jong u.
Wat la katta, u Gates u la ong ba um kwah ia ki ba kin pyniaid lane pyniar ia ka Microsoft. Pynban, u kwah ban ai lad ia ki ba kin wad ia la ka jong ka jingsngewtynnad, ka jinglah bad ka sap jongki, ha kano- kano ka kam kaba ki sngewlah ban pynlong briew bad ban kyntiew ia ka iing- ka sem jongki kumba u la ialam lynti.
U Gates u don lai ngut ki khun na ki lok barim, ka Rory Gates, ka Jennifer Gates Nassar bad ka Phoebe Gates.
