Shillong, Ïaïong 08
Ka All India Football Federation (AIFF) ka la pynbna tang ïa ka Churchill Brothers kum ka lahduh hadien ba ka la pyndep ïa ka jingïakhun ha ka I-League da kaba ka la wan ha ka kyrdan ba ha khlieh duh ryngkat 40 poiñ.
Ka dei ka nam lahduh kaba phylla ha kaba kut jong ka league, hynrei kiba la ïalum ha ka kad liengsuiñ jong ka Goa, Dabolim, kim shym la don ka jingsngew artatien.
“Kiei ki nongjop”, la pyrta ki nongïalehkai katba ki dang mih na kad liengsuiñ ha ka por janmiet jong ka Lah Sngi U Blei. “Ka Churchill Brothers,” ka dei ka jubab kaba stet na kiwei pat ki dkhot jong ka kynhun bad ki nongkyrshan kiba la ïalum lang ban ai ïa ka jingpdiang sngewbha ïa ka kynhun jong ki kum ki nongjop.
Ki banner kiba la satah ha kylleng ki jaka ki pynbna ïa ka Churchill kum ka nongjop ha kaba ka jinglehkmen ka la long kaba shai.
“Kane ka kyrdan ka mut ïa ka pyrthei na ka bynta jong ngi,” ong ka CEO jong ka klob ka Valanka Alemao katba ka dang ïashim bynta ha ki jingrakhe ba sngewtynnad jong ka kynhun. “U kpa jong nga (Churchill Alemao) u la ai lut na ka bynta ka phutbol ha India. Ngi la jop ïa manla ki trophy kaba don ha ka ri, lait noh tang ka ISL, ha kaba ngim shym la ïashim bynta. Kane ka khyllipmat ka dei jong u kpa jong nga. Na ka bynta jong u, ka phutbol ka wan nyngkong. Ka phutbol ka long kum ka longïing ha u, bad nangta ka dei ka saiñ pyrthei. Une u briew u dei hok ban ïoh ïa baroh.”
U Alemao u la pynïaid ïa ka kynhun ïalehkai phutbol lajan 40 snem. Ka Churchill ka la jop arsien ïa ka nam lahduh ha ka I-League ha ki por ba la leit. Ka nam lahduh kaba lai jong ki – kaba hap ha ka rai jong ka appeal committee jong ka AIFF ha kaba kut jong une u bnai – kan kham thiang bha namar kan ïalam ïa ki sha ka kyrdan ba ha khlieh duh jong ka ISL halor ka jinglah ha ka jingïalehkai.
“Kane ka kyrdan ka long kaba dei hok bha namar ki rangïalehkai ki la ïaineh haduh 10 bnai, da kaba jngai na la ïing la sem bad ki bahaïing bahasem jong ki. Kane ka nam ka long kaba kyrpang namar ba ka dei ka jingangnud jong u kpa jong nga, bad mynta ka la urlong,” ong ka Valanka.
Ka CEO jong ka klob kam shym la kwah ban kren halor ka rai jong ka AIFF ban pynsangeh noh ïa ka jingpynbna, bad ka trophy. Kata ka long kaba lah ban sngewthuh. Hadien kine baroh, ka Valanka ka dei ka dkhot jong ka komiti treikam jong ka synjuk. “Ngan ong tang kawei: ïa ki jingïakop la jop ha madan, bad ym ha ki ophis bad ki kamra bishar.”
Ka jingïakhun kaba nyngkong na ka bynta ban ïoh rah ïa ka khusnam jong ka I-League kan long ha ka jingbishar jong ka AIFF appeal committee ha ka 28 tarik mynta u bnai. Ka Churchill ka la pyndep da kaba ïoh 40 poiñ hadien ka jingïakhaid pyrshah ïa ka Real Kashmir, hynrei ka Inter Kashi ka la ïoh 39 poiñ- ka dang lah ban ïoh rah ïa ka nam lahduh.
