Shillong, Ïaïong 09
Ka Meghalaya ka la bat ïa ka kyrdan ba hakhlieh ha ka Group-A hadien ba ka la jop da 29 run ïa ka Nagaland ha ka jingïa-khun kaba ar jong ka NECDC Senior Women Tournament 2025 ha ka Sngi Balang ha Rangpo, Sikkim.
Ka Debasmita Dutta sa shisien pat ka la pynpaw ïa ka jingtbit namar ka la lah ban tied ïa ka shiteng spah kaba 68 run na 65 bol hadien ba ka Meghalaya ka la shimti ban tied nyngkong da kaba ïoh 122 run bad shah pynhap 4 wiket ha ki 20 over. Ka Nagaland kam shym la lah ban kynjoh sha ka thong namar ka la ïoh 93 run bad shah pynhap 9 wiket.
Hadien ba ka la lah ban pynliem ïa ka Mizoram ha ka Sngi Ba-ar, ka Meghalaya ka la lah ban bat ïa ka kyrdan ba ha khlieh ha ka Group-A. Ka Nagaland kaba la pynliem ïa ka Mizoram ha ka sngi sdang, ka la wan ba-ar. Te kumta ka Meghalaya bad ka Nagaland ki la rung sha ka semi-final ha kane ka lympung ba la pynlong da ka North East Cricket Development Council lem bad ka Sikkim Cricket Association.
Ka Debasmita ka la khyrwit 10 tylli ki ‘four’ ha ki shiteng spah run, katba ka Neha Hajong (20 run na 21 bol) bad ka Ajima Sangma (15 run na 7 bol) ki la ïarap ïa ka Meghalaya ban buh ïa ka thong kaba heh. Katba ka Imsusenla Longkumer, Mengusenuo bad ka Sariba Khan ki la shim mar shi wiket na ka bynta ka Nagaland.
Haba wan beh ïa ka thong, ki nongtied ka Nagaland ki la shah khanglad na ka bynta ban ïoh tang 93 run bad shah pynhap 9 wiket. Ar ngut ki nongtied ki la shah pynkhyllem khlem da lah ban ïoh run ha kaba sdang jong ki 3 over.
Ka Monica Singh ka la pynphai biang ban ïoh ïa ka nam ‘best bowling’ na ka bynta ka Meghalaya, namar ka la shim 2 wiket/13 run ha ki 4 over, katba kiwei pat kiba ïoh ban shim wiket ki long ka Indariakor K. Wanñiang (1 wiket /12 run ha ki 2 over), ka Rubi Chettri (1 wiket /13run ha ki 4 over) bad ka Neha (1 wiket /15run ha ki 2 over).
Ka Debasmita ka la ïohpdiang ïa ka nam ‘Player of the Match’ lyngba ka jinglah ban ïalehkai bha. Te kumta ka la ïohpdiang ïa ka khusnam na u President jong ka Sikkim Cricket Association, u Tika Subba.
Ka Meghalaya kan pynkhreh ban ïakhun pyrshah ïa ka Manipur ha ka semi final kaba nyngkong mynta ka sngi Palei, katba ka Sikkim ïa ka Nagaland.
