Nongstoiñ, Ïaïong 10
Ka Pyndengrei SCSC ka la ïoh ïa ka jingjop kaba khatduh ha ka lympung ïalehkai Super Division jong ka NDSA Premier League Football Tournament 2024-25 ba la pynlong da ka Nongstoiñ District Sports Association.
Kane ka nam jop ka la wan urlong hadien ba ka la lah ban pynliem noh ïa ka Upper New Nongstoiñ da 4-1 kol ha ka sngi Palei ha madan New Nongstoiñ bad ka la pynthikna ïa kane ka kynhun ban rung sha ka ‘top four’.
Lyngba kane ka jingjop ha kane ka jingïalehkai kaba khatduh jong ka league, ka Pyndengrei ka la ïoh 17 point na ki phra sien ïakhun bad ban kiew ruh sha ka kyrdan ba ar ha ka miej ïakheiñ point, katba ka Upper New Nongstoiñ SC ka la duh rung sha ka ‘top four’ ha kaba ka la ïai sah ha ka kyrdan ba hynñiew ryngkat tang 6 point na ki phra sien ïakhun.
Nalor ka Pyndengrei SCSC, kiwei pat ki kynhun kiba la ïoh rung sha ka ‘top four’ ki kynthup ïa ka Mawlarshong SC kaba dei ka kynhun ïalehkai kaba bat ïa ka kyrdan kaba hakhlieh ryngkat 19 point na ki phra sien ïakhun, katba Sawlad SC ka la wan balai bad basaw ka Nongstoiñ FT.
Na ka liang ka Football Committee jong ka NDSA ka la pyntip ba ka jingïalehkai knockout jong ka Super Division kan sdang ha ka15 tarik mynta u bnai da ka jingïalehkai qualifier -1 hapdeng ka Mawlarshong SC pyrshah ïa ka Pyndengrei SCSC ha ka por 2 baje noh phai sngi, katba ka jingïalehkai eliminator kan long ha ka 16 tarik hapdeng ka Sawlad SC pyrshah ïa ka Nongstoiñ FT ha ka por 2 baje noh phai sngi.
