Shillong, Ïaïong 10
Shi bynta ban kyntiew ïa ki khynnah kiba don sap ha ka kam ïalehkai phutbol, ka Mawlai Sports Club ha ka sngi Ba-ar ka la pynlong ïa ka lympung ïalehkai Inter Dong Under-15 bad Under-17 kaba la plie da u Bah Hering Shangpliang ha Madan Heh Mini Stadium kaba ha Mawlai Phudmuri.
Ha kane ka lympung la wan shim bynta 10 tylli ki kynhun ha ka Under-15 bad 10 tylli ha ka Under-17.
Haba phai sha ka jingïakhun Under-17 jong kane ka sngi sdang hapdeng ka Nonglum bad ka Mawroh ka la long kaba ïakhaid bha bad ha kaba kut ka Nonglum ka la jop da 3-2 kol pyrshah ïa ka Mawroh.
Ha kane ka jingplie pyrda la don ryngkat ruh u Bah M. Kharbani, President, Bah G.S Kharbuli, Senior Vice President, Bah Ezekiel Mond, Joints Secretary bad kiwei ki ‘riew rangbah.
Haba ai jingkren ha kane ka sngi, u Bah Hering u la kyntu ïa ki Dong ha Mawlai ba kin ai ïa ka rynsan (platform) ïa ki khynnah da kaba ïashim bynta ha kum kine ki prokram khnang ba ki khynnah ki ïoh ban sei ïa ki sap ki phong jong ki bad ym ban ïashim bynta tang ban ïoh rah Trophy. U ong ruh ba kane ka jingïashim bynta ha kajuh ka por kan long ka jingïarap na bynta ka kynhun ïalehkai jong ka Mawlai ha ki snem ki ban wan.
