Shillong, Ïaïong 11
Ka kynhun ïalehkai cricket ki kynthei ka Meghalaya ka la pynliem ïa ka Manipur da 8 ron ha ka jingïalehkai semi final kaba itynnad bha jong ka lympung ïalehkai ba ar jong ka NECDC Senior Women Tournament 2025 ha Rangpo, Sikkim ha ka Sngi Thohdieng.
Ka Meghalaya ka la lah ban ïoh 109 run na ki 7 wiket bad ban khanglad ïa ka liang pyrshah haduh 101 run na ki 7 run ha ka jingïalehkai T20.
Ïa kane ka jingïalehkai la buh ban long hynnin ka sngi hynrei la pynsangeh noh namar ba jur slap. Lyngba kane ka jingjop ka Meghalaya kan ïoh ban ïakhun lashai ka sngi ha ka final ban ïakhun ïa ka nam lahduh bad ka Sikkim kaba long ka nongjop jong kane ka lympung ba la dep bad kumjuh ïa ka semi final pyrshah ïa ka Nagaland. Ïa kane ka jingïalehkai la pynlong da ka North East Cricket Development Council (NECDC) bad ka nongpdiang ïa kane ka lympung kaba dei ruh ka Sikkim Cricket Association.
Ka Manipur haba jop kynting pisa ka la ailad ïa ka Meghalaya ban tied nyngkong. Ka Luiza Tamang ka la lam khmat da 42 run na ki 49 bol, ka kylla ba nyngkong kaba kynthup ïa phra tylli ki “Four’ bad kawei ka ‘Six’. Ka la ïoh ïa ka jingkyrshan kaba biang bha na ka Daiaka Emigale Warjri, kaba la ïoh 24 run na 27 bol, katba ka Neha Hajong bad ka Indariakor K Wanniang baroh ar ngut ki la ïoh mar 11 run.
Hynrei ka Manipur ka la ïai bteng ban ïaleh ïa kane bad pynpra ïa ki jingïatreilang da kaba ïoh pynhap da ka wiket kaba saw, ha kaba ka 38 run kaba la ïoh hapdeng ka Luiza bad ka Daiaka bad ka dei kaba kham neh slem ha ka jingïalehkai. Na ka bynta ka Manipur, ka kapten ka RK Linthoingambi Devi, nangta ka Monica Devi Ningthoujam bad ka Ranjita Devi Koijam ki la shim mar ar wiket.
Ha kaba beh ïa ka thong, ka Seterny Devi Brahmacharimayum ka la ïoh kham bun run kata da 36 run na 45 bol katba ka Meghalaya ka la long tbit bha ha ka jingïalehkai pyrshah ha kane ka por. Ka Rubi Chettri ka la shim 2 wiket na ki 14 bol bad baroh san tylli pat kiwei ki wiket jong ka Manipur ki la hap lyngba ka ‘run out’.
Ha ka over kaba khatduh, ka Manipur ka la donkam 13 run ban jop bad donkam ban tied da ki “Four’ na ki lai tylli ki bol. Hynrei ka Monica Singh kum nongkawang bol ka la lah ban khlem ai run eiei lyngba lai tylli ki bol bad pynthikna jingjop syndon ïa ka Meghalaya.
Ka Rubi, ka la shah jied kum ka ‘Player of the Match’.
Da kane ka jingjop, ka Meghalaya ka la rung sha ka final ha kaba kan ïakhun pyrshah ïa ka Sikkim kaba kum ma ki ka dei kaba khlem shah rem ha kane ka lympung. Ka jingïalehkai phainal kan sdang naduh ka por 9:30 mynstep jong ka sngi Saitjaiñ bad ïa kane ka jingïalehkai yn pyni live lyngba ka YouTube Channel ba thikna jong ka Sikkim Cricket Association bad ha ka CricHeroes app.
