Shillong, Ïaïong 11
Ka East Khasi Hills Cricket Association (EKHCA) ka la pynlong ïa ka (L) Benjamin Diengdoh Memorial Under 16 Boys Inter School Cum Cluster Cricket Tournament 2025 ha madan Pynshadkhurai, Saitsohpen, Sohra kaba la sdang naduh ka Sngi Thohdieng ka 11 tarik Ïaïong.
Ha kane ka sngi sdang ka jingïalehkai ba nyngkong ka la long hapdeng ka Sohra Cluster (A) pyrshah ïa ka Sohra Cluster (B).
Ka Sohra Cluster (A) hadien ba la jop kynting pisa ka la jied shwa ban kawang bol. Ka Sohra Cluster (B) haba wan tied nyngkong ka la ïoh 43 run na ki 7 wiket ha ki 15 Over. U Arky Iangjuh u la tied 12 run bad u Henzil Kharpuri u la shim 3 wiket na ki 2 Over.
Ka Sohra Cluster (A) haba wan beh ïa ka thong ka la ïoh 44 run na ki 5 wiket ha ki 6 Over. U Samborlang Lyngdoh u la ïoh 5 run bad u Guiding Sohkhlet u la ïoh shim 2 wiket na ki 2 Over.
Kane ka la pynlong ïa ka Sohra Cluster (A) ban jop da 5 wicket bad ïa ka nam ‘Player of the Match’ la ïohpdiang da u Henzil Kharpuri.
Ha ka jingïalehkai kaba bud, ka jingïakhun ka long hapdeng ka Pongtung Cluster pyrshah ïa ka Mawsynram Cluster. Ka Pongtung Cluster haba jop kynting pisa ka la jied shwa ban kawang bol nyngkong. Ka Mawsynram Cluster haba wan ban tied ka la ïoh 76 run ban duh 7 wiket ha ki 15 Over. U Mekhraw Pathaw u la ïoh 19 run katba u Jebenti Lyngdoh u la shim 3 wiket ha ki 3 Over.
Ha kaba beh ïa ka thong ka Pongtung Cluster ka la lah ban ïoh 77 run na ki 7 wiket ha ki 15 Over. U Mewanshailang Khongmawlong u la ïoh ban kamai kham bun run kata 26 run, katba u Pynkhraw Jomati u la shim 4 wiket ha ki 3 Over.
Ha kaba kut ka jingïalehkai ka Pongtung Cluster ka la jop da 3 wiket bad u Jebenti Lyngdoh u la ïohpdiang ïa ka nam ‘Player of the Match’.
