New Delhi, Iaiong:
Ha kane ka khubor la ong ba kawei ka nong US ka la wan shitom naduh na la shnong ha United States sha Andhra Pradesh jong ka ri India tang ban ioh shongkurim ia u briew ba ka la ia ieid ‘online’.
Ka Jaclyn Forero, ka dei ka nongshondur bad ka la shong jingieid ia une u nong India uba la ju ithuh kum u Chandan, hadien ba ka la iohi ia ki dur bad ioh ban iakren bad u lyngba ka ‘Instagram’.
Kumta la ong ba jingieid jong ki ka sdang tang na i shi kyntien, da kaba shu ong tang ‘Hi’, hynrei kane ka jingsdang jong ki ka la wanrah ia ka jing-iadei kaba jylliew hapdeng jong ki la 14 bnai mynta. Kine ki shijur mynta ki la rai ban iathoh shongkurim noh khlem da pynslem shuh namar ki la sngewthuh ba ka jingiadei hapdeng jong ki ka la skhem bha bad kam dei shuh kaba ki shu iajan ne iaiad shngaiñ.
Katei ka samla ka iathuh ba ka la kum shoh jingieid ia utei u nong India naduh kaba sdang hi ba ka peit bniah lyngba ka ‘Instagram Account’ jong u, bad kaba shem ba u long u Khristan bad u long ruh u briew uba jemnud bad uba sngewtynnad bha.
Kumta, tang hadien 8 bnai ba ka la iaieid bad iajuh-iajan bha bad u lyngba ka ‘Online’, ka Forero ka la ioh ia ka jingmynjur na ka liang ka kmie jongka bad kumta baroh 2 ngut ki la wan her lang sha ri India ban pynlut ia ka por jongki baroh shi jingim ha kane ka ri ha ryngkat bad une u briew uba ka la rai ban shong-sah ryngkat baroh shyrta.
Watlakatta, katei ka samla nong US, ka la pynpaw ba ki don bun ki briew kiba kren beiñ, don kiba iaroh ruh, don pat ruh kiba kynthoh bad don kiba ai mynsiem ia ka jingiadei hapdeng jongka bad utei u nong India hynrei ka la ong ba kam shym pynsngap ia ka jingkren sniew jong ki briew kiba bun hynrei ka ialeh ban bat tang ia ki jingmut kiba bha, watla ma ka, ka tam ia utei u samla jongka haduh 9 snem.
Hynrei katei ka samla ka la iathuh ba mynta, ki dang aplai ia ka ‘Visa’ naka bynta u Chandan, ba kin ioh ban leit sah lang beit noh shyrta hapoh United States, kaba long ka ri bad ka shnong trai jongka hi.
