Jowai, Ïaïong 15
Ka Mupliang CC ka la pynliem noh ïa ka Khim-usniang SC da 5 wiket ha ka lympung ïalehkai District Cricket League ba la pynïaid da ka West Jaiñtia District Cricket Association (WJDCA) ha ka sngi Ba-ar.
Ha kane ka jingïakhun ka Mupliang kaba la jop ïa ka kynting pisa, ka la ailad shwa ïa ka Khimusniang ban tied nyngkong ha kaba ka la ïoh 165 run bad shah pynhap 6 wiket ha ki 35 over.
Haba wan shimti ïa ka pali kaba ar, ka Mupliang ka la lah ban kynjoh sha ka thong da kaba ka la tied 166 run bad shah pynhap 5 wiket ha ki 25.5 over. U Oni Wanker Sna na ka Mupliang u la khur ïa ka nam Man of the Match hadien ba la ïoh 68 run.
Ka jingïalehkai ha ka sngi Balang kan long hapdeng ka Ummulong S.C pyrshah ïa ka Evergreen Mukhla Mission ha ka por 9 baje mynstep.
