Shillong, Ïaïong 16
Ka Bengaluru Football Club ha ka Sngi Ba-ar ka la kam ba u trai jong ka, u Parth Jindal, u la ngat ïa ki “jingpdung bad jingmynsaw” na ka jingshah kawang bom pataka ha ki nongkyrshan ka Mohun Bagan kiba la wan sakhi ïa ka jingïakhun final ha ka Indian Super League mynshem taïew ha Salt Lake Stadium.
Ka klob ka la ïathuh ba ïa kitei ki bom pataka la kawang sha ki jaka shong jong ka BFC ha kaba ki la don kiba ngat ha ki jingmynsaw ha ki bynta jong ki khmat na katei ka jingjia.
Ka BFC kaba la shah rem ha ka jingïakhun final da 1-2 ha ka extra time, ka la ong ba ka la ujor da ka jingthoh kaba pura sha ka All India Football Federation (AIFF).
“Ka Bengaluru FC ka pynrem jur ïa ka jingshah thombor khlem da pyrkhat bad ka jingleh riewkhlaw jong ki nongkyrshan jong katei ka kynhun, ha kaba la kawang ïa ki bom pataka na jaka shong jong ki ha ka jingïalehkai final jong ka ISL pyrshah ïa ka Mohun Bagan Super Giant ha Kolkata ha ka sngi Saitjaiñ.”
“Katei ka jingjia ka la pynlong ïa uwei u nongkyrshan jong ka BFC ban mynsaw ha ki bynta jong ki khmat ha kaba u la donkam ban shah sumar, katba kiwei pat ki nongkyrshan, kynthup ïa u trai jong ka klob u Parth Jindal kiba la ngat na ka jingpdung bad jingmong,” ong ka BFC ha ka jingthoh kaba thoh ha rynsan jong ka ‘X’.
Ka klob ka la kyntu ruh ïa ka AIFF bad ka nongpynïaid ïa ka ISL ka FSDL ban shim khia da kaba tyngeh ban pynthikna ïa ka jingshngaiñ jong ki nongkyrshan ha ki madan ïalehkai.
“Ka klob ka la mudui da ka jingujor kaba pura sha ka AIFF bad ka FSDL bad ka la ïatreilang bad ka Federation bad ka League ban pynthikna ba ïa kane ka jingjia yn pynbeit bad ban leh da ka rukom kaba buh nuksa ïa ki kyndon jingïada jong ki nongkyrshan ha ki madan ïalehkai.
“Kum kine ki kam kin buh jingma ym tang ka jingim jong ki briew, hynrei kan ktah ïa ka mynsiem jong ka jingïalehkai jong ngi. Ki madan ki dei ban long ki jaka ba shngaiñ, mynta bad man ka por. Kum kine ki kam kim don jaka ha ka phutbol ne shano-shano ruh.”
Lah ban kdew ha ka 12 tarik mynta u bnai, ka Mohun Bagan Super Giant ka la long kum ka lahduh ha ka sien ba ar ha ka ISL, da kaba ka la lah ban pynliem ïa ka Bengaluru FC da 2-1 ha ka phainal bad ban long ruh ka kynhun nongjop ha ka League jong kane ka samoi.
Hadien ka jingbym lah ban thep kol ha ka kylla step, u Alberto Rodriguez ka Mohun Bagan u la kum thep hi ha ka minit kaba 49 bad pynlong ïa ka Bengaluru FC ban tam da shi kol. Hynrei ka Mohun Bagan ka la lah ban pynphai kylla lyngba ka penalty ba la shut da u Jason Cummings ha ka minit kaba 72 na ka bynta ban ïaryngkat mar shi kol. Dei ha ka extra time, ba ka Mohun Bagan ka la lah thep biang sa shi kol ha ka minit kaba 96 lyngba u Jamie Maclaren bad ban ïoh jingjop shisyndon.
Te kumta ka Mohun Bagan ka la long ka kynhun kaba ar ha ka ISL ban jop ha ka League bad ban rah ïa ka nam lahduh ha kajuh ka samoi ïalehkai hadien ka Mumbai City kaba la jop ha ka samoi ïalehkai 2020-21.
