Jerusalem, Iaiong:
Ka tnat shipai jong ka Israel ha kane ka kynti, ka la kam ba shi bynta na ka nongbah Gaza, la ioh synshar hi da ki shipai Israel bad la ioh ban pynkylla ia katei ka bynta sha ki jaka ba shngaiñ hapoh ka jingkhmih bad jingpyniaid jong ki shipai Israel.
Ha kawei ka video ba la pyllait paidbah da ki shipai, ka pyni ia ka “Morag Corridor” kaba iaid lyngba kawei ka jaka hapdeng ka Rafah bad Khan Younis, kaba pyniasoh ia ka Rafah na Khan Younis bad napdeng jong ka Gaza.
Ha katei ka video, ka Khan Younis, kaba dei ka nongbah kaba heh tam ha ka phang Shatei Lam Mihngi jong ka nongbah Gaza, ka paw ba ka la jan shah pynjot lut, ha kaba ki dang sah sa tang katto katne ki jingtei kiba la shah pynjulor jur.
Lait na ka “Morag Corridor,” ka Israel ka la seng ruh sha “Netzarim Corridor” ha ka por thma, ka jaka rieh tngen shipai hapdeng jong ka Gaza kaba thmu ban pyniakhlad ia ka nongbah Gaza bad ka thaiñ Shatei Lam Mihngi jong ka Gaza na kiwei pat ki bynta jong ka.
Ka Israel, ka la khanglad ia ka jingrung jong baroh ki jingiarap sha Gaza, naduh ka 2tarik Risaw.
Nangta ka la pynkut noh ïa ka jingsangeh thma kaba ar bnai bad ka Hamas ha ka 18 tarik u Lber bad ka la sdang biang ïa ki jing-leit hiar thma nalor suiñ bad na ryngkew ha katei ka jaka ba la buh kyrpang.
Ki shipai ki la ong ba naduh ka 18 tarik u Lber, ki la pynlong ïa ki jinghiar thma da ki liengsuiñ kumba 1,200 tylli ki jaka ha Gaza da kaba pyndonkam haduh 350 tylli ki liengsuiñ ïapom bad kiwei kiwei ki liengsuiñ.
Ki jinghiar thma ba thymmai jong ka Israel haduh mynta ka la shim kumba 1,652 ngut ki mynsiem briew jong ki nong Palestine bad ha kaba, kiba mynsaw ki la don kumba 4,391 ngut baroh.
Ka Israel ka khanglad noh ruh ia ka jingpynpoi jong baroh ki lad jingiarap kiba dei ban poi sha ki paidbah nongshong shnong jong ka nongbah Gaza bad kiba la phah da kiwei pat ki ri ne ki tnat iarap jong ka pyrthei.
