Bengaluru, ïaïong:
Ka jingïalang ba kyrpang jong ka kynhun Myntri kaba u Myntri Rangbah ka jylla u Siddaramaiah u la khot ban ïakren ïa ka kaiphot jong ka Socio-Economic and Educational Survey-2015 (SES-2015) kaba la tip paidbah kum ka ‘Caste Census’, ka la sah khlem kut namar ba ym shym la lah ban poi sha ki rai.
U Myntri ka tnad Law & Parliamentary Affairs u HK Patil u la ong ha ki nongthoh khubor hadien ba la wai ka jingïalang jong ka kynhun Myntri, “Ka kynhun Myntri ka la ïakren ïa ka kaiphot ha ka jingïakren kaba ïajan, hynrei kam shym la biang satia namar ba ngi (ki Myntri) ngi sngew ba dang donkam shuh shuh katto katne ki jingtip bad ki jingtip ba bniah.
Ki Myntri ki la ïakren halor ki kyndon ba la pyndonkam ban thew ïa ka jingbun briew bad ka jingsahdien, bad ki la bishar bniah ïa ki jingtip ba bniah bad ki kyndon ba la pyrkhat ha ka por ba leh ïa ka jingjurip, u la ong.
Ka jingïalang jong ka kynhun Myntri ha ka 24 tarik, Ïaïong Risaw kaba la thmu ban long ha MM Hills ha Chamarajanagar distrik ka dei ban ïakren ïa ki kam pynroi jong ka thaiñ, bad ym ïa ka kaiphot SES-2015, u la pynshai.
U Patil u la pynpaw ka jingshaniah ba ha ka jingïalang jong ka kynhun Myntri ha ka 2 tarik u Jymmang, baroh ki Myntri kin shim ïa ka rai ban poi sha ka rai namar kin ïoh ïa ka dur kaba shai bha jong ka kaiphot SES-2015 kaba pynksan ïa ka jinglong jingman ha ka imlang-sahlang bad ka pule puthi jong ki jaitbynriew.
Kawei na ki jingai jingmut ha ka kaiphot SES-2015 kaba la khring ïa ka jingpyrkhat ha ka jingïalang jong ka kynhun Myntri ka long ban pynkynriah ïa ka jaitbynriew Kuruba (ha kaba u CM Siddaramaiah u don bynta) na ka kyrdan 2A sha ka kyrdan 1B, ban kheiñ ïa ka kum ka jaitbynriew kaba dang sahdien tam.
Uwei na ki Myntri u la pynpaw ïa ka jingkdew ba la tap da ka dur kaba rit, hynrei u Siddaramaiah u la sngap jar jar, ong ka tyllong khubor.
Ki tyllong khubor kiba tip ïa ka jingïalang jong ka kynhun Myntri ki la ong ba u Myntri ka tnad rep u SS Mallikarjun u la pyrshah jur ia katei ka kaiphot, da kaba ong ba dei ban kyntait noh ïa ka. La ong ba u la pynpaw ïa ka jingsngew jong u kpa jong u – u President jong ka Veerashaiva Mahasabha bad u MLA ba rangbah jong ka seng Congress, u Shamanuru Shivashankarappa – ba ka jaitbynriew Veerashaiva Lingayat ka long kaba duna ka jingkheiñ bad ka bynta kaba khraw jong ki nongshong shnong ka la shah iehnoh shabar jong ka jingwad bniah.
La ïathuh ba u Myntri ka tnad Labour, u Santhosh Lad, u la tuklar bad ai jingmut ba ka don ka lad ban kynthup ïa kito kiba la sahkut ha ka jingjurip. La ïathuh ba kine ki arngut ki la ïakynduh jingeh bha haba u HK Patil u la pynjem ïa ka jinglong jingman, ong ka tyllong khubor.Hynrei u Patil u la kyntait ba la don kano kano ka jingiakren kaba jur bha hapdeng ki Myntri. U Myntri uba dei khmih ïa ki khlaw u Eshwar Khandre, uba dei na ka Veerashaiva Lingayat, u la pynpaw ruh ïa ka jingsngewkhia jong u halor katei ka kaiphot, da kaba ong ba un hap ban kitkhlieh ha ka imlang-sahlang jong u bad ki nongthep vote jong u, bad kumta u la pan ïa ka jingïasyllok kaba kham jylliew na ka sorkar bad ki nongshim bynta, shwa ban poi sha ka rai.
U Myntri ka tnat PWD u Satish Jarkiholi u la ong ba ïa ka rai kaba khatduh ym lah ban poi tang ha ka jingïalang kaba marwei. La ïathuh ba shiteng na ki Myntri ha ka jingïalang jong ka kynhun Myntri ha ka sngi Palei, kim shym la ïashim bynta ha ki jingïakren.
U Myntri Rangbah u Siddaramaiah u la ailad ïa ki ban aiti ïa ki jingmut jong ki da kaba thoh ne kren ha ka jingïalang jong ka kynhun Myntri ban wan ha ka 2 tarik u Jymmang.
