Nongstoiñ, Ïaïong 21
Ka Ladnongsba SC bad ka Mawkhlam SC ki la lah ban pynthikna ban jam sha ka semi final ha ka First Division jong ka NDSA Premier League Football Tournament 2024-25.
Ka jinglah ban pynthikna ka Ladnongsba SC ka la wan hadien ba ka la pynliem noh ïa ka Sapki West da 2-0 kol ha ka jingïalehkai quarter final kaba la long ha ka sngi Saitjaiñ jong ka taïew ha madan New Nongstoiñ.
Shuh shuh ka nam jop jong ka Mawkhlam SC pat ka la wan hadien ba ka la lah ban pynliem noh da 2-0 kol ïa ka Steplanglur SC ha ka quarter final pyrshah kaba la long ha katei ka sngi.
Na ka liang ka Football Committee ka NDSA, ka la pyntip ba kawei pat ka jingïalehkai quarter final kaba khaduh jong kane ka lympung kan long biang mynta ka sngi Ba-ar hapdeng ka Nongkhlaw SC pyrshah ïa ka Marskuiñ SSCC ha ka por 2 baje nohphai sngi.
