Jowai, Ïaïong 22
Ka West Jaiñtia Police CC ka la pynliem noh ïa ka Evergreen SC & CC da 131 run na ka bynta ban khur ïa ka jingjop ha ka District Cricket League 2025 ba pynïaid da ka West Jaiñtia Hills District Cricket Association ha ka sngi Ba-ar.
Ka West Jaintia Police CC ka la kam trai ban tied hyngkong ha kaba ka ïoh 196 run na ki 35 over bad shah pynhap 7 wiket. U Devention Lyngdoh u la lah ban pyni shisha ïa ka sap kum u nongtied da kaba u la khyrwit 90 run (khlem shah pynkhyllem) na ki 79 bol. Kine ki kynthup ïa lai tylli ki ‘six’ lem bad shiphew tylli ki ‘four’. U Habanjop Khonglah pat u la tied 23 run na ki 45 bol ryngkat bad kawei ka ‘four’. Katba u Lodumaitphang Khonglah jong ka Evergreen u la khur 3 wiket ha ki 7 over.
Haba wan beh ïa ka thong, ki nongtied ka Evergreen kim shym la lah ban ïalehkai bha na ka daw ka jingïakhun tyngeh ki nongkawang bol ka West Jaiñtia Police bad ki la shah pynhap uwei hadien uwei bad ban ïoh tang 65 bad shah pynhap 10 wiket ha ka 21.2 over. U Devention Lyngdoh bad u Bishal M Sangma, ki nongkawang bol jong ka West Jaiñtia Police ki la ïoh ban pynhap mar 3 wiket na ki 4 over. Te kum u Devention Lyngdoh u la khur ïa ka nam Man of the Match.
Ha ka sngi Balang ka jingïalehkai kan long hapdeng ka Ummulong SC pyrshah ïa ka Mowkaïaw CYC ha ka por 9 baje mynstep.
