Shillong, Ïaïong 22
Ka shlem treikam u District Sports Officer (DSO) East Khasi Hills ha ryngkat ka jingïasnoh kti lang bad ka East Khasi Hills District Athletics Association, ka la pynbna ba kan sdang noh ïa ka District Level Inter School Athletic Meet 2025 naduh 6 haduh 8 tarik u Jymmang mynta u snem ha SAI STC Shillong kaba don ha NEHU.
Ïa kane ka lympung la phiah sha lai tylli ki kyrdan ïalehkai ha ka liang ki khynnah shynrang bad kynthei, kita ka Under-14, Under-16 bad ka Under-18.
Ha katei ka lympung ïalehkai kaba lai sngi lynter yn pynlong ïa ki jingïakop mareh bapher bapher, kynthup ïa ka High Jump, Long Jump, Shot-put, Javelin Throw, Discus Throw bad kiwei kiwei.
Kane ka lympung ka long ruh ha kajuh ka por ban plie lad ïa ki khynnah ba kin pyni ïa ki sap ïalehkai ba kyrpang. Na ka liang ka shlem treikam kan sa jied ïa ki khynnah kiba kynsai tam ban mihkhmat pat sha ka State Level ka ban sa long ha ki bnai ban wan.
